Ақтау қалалық №2 емханада стоматологиялық кабинет ашылды

Стоматологиялық кабинет екінші қабатта орналасқан. Арнайы кресло және стоматологиялық қондырғымен жабдықталған. Науқастар екі пакет, яғни тегін медициналық көмектің кепілдендірілген көлемі және міндетті әлеуметтік медициналық сақтандыру негізінде сапалы көмек ала алады.

Тіс дәрігері ретінде жұмысқа жоғары санатты дәрігер Шәміл Надир шақырылды.

«Біз ғана емес, тұрғындар да Ақтау қалалық №2 емханасының базасында стоматологиялық кабинеттің өз жұмысын бастағанына қуанып жатыр. Біздің міндет – сапалы қызмет көрсету. Облыстың денсаулық сақтау басқармасы тарапынан қолдау бар, жұмыс істеу үшін барлық жағдай жасалып отыр. Тіс дәрігері кабинеті күн сайын таңғы 9:00-дан кешкі 17:00-ге дейін жұмыс істейді», - дейді Шәміл Надир.

Күніне 30-ға жуық адам тіс дәрігеріне келіп, сапалы қызмет алуына болады. Кейбір науқастарда тіс кариесінің күрделі түрлері диагнозы қойылған, біреулер тісін жұлдыруға келсе, енді біреулер медициналық тексеруден өтуге келеді екен.

Тегін стоматологиялық көмек 18 жасқа дейінгілерге, жүкті әйелдерге және халықтың әлеуметтік осал топтарына көрсетіледі.

Естеріңізге сала кетейік, шұғыл стоматологиялық көмек мемлекет есебінен тегін медициналық көмектің кепілдендірілген көлемі шеңберінде көрсетіледі. Ұлы Отан соғысының қатысушылары, 1, 2, 3 топтағы мүгедектер, «Алтын алқа», «Күміс алқа» медалімен марапатталған көпбалалы аналар, атаулы әлеуметтік көмек алушылар, жасы бойынша зейнеткерлер, инфекциялық, әлеуметтік мәні бар аурулармен және айналасындағыларға қауіп төндіретін аурулармен ауыратын науқастарға тегін көмек алуына кедергі жоқ.

Бүгінде Ақтау қаласы бойынша барлығы 7 емхана бар. Оның екеуі мемлекеттік болса, қалған бес емхана – жекеменшік. Бұрын барлығы облыстық стоматологиялық орталыққа баратын болса, енді тіс дәрігерінің қызметі №2 емханада да қолжетімді болмақ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.