Кеше Маңғыстау облысының әкімі Серікбай Трұмовтың төрағалығымен қоғамдық кеңестің отырысы өтті. Күн тәртібінде өңірдегі туристік саланы дамытуға, дәлірек айтқанда Бозжыра шатқалы аумағында қонақ үй салу мәселесі қаралды. Бұл туралы Маңғыстау облысы әкімдігінің баспасөз қызметі хабарлады.
Серікбай Трұмов елімізде карантиндік шектеулер енгізілгеннен бері қазақстандықтардың басым бөлігі ішкі туризмді таңдағанын атап өтті.
«Ағымдағы жылы біздің өңірде туристер санының артуы байқалады, бұл ең алдымен бес жұлдызды қонақ үй кешенінің ашылуымен байланысты. Келген қонақтар, мейманхана аумағымен шектелмей, Маңғыстаудың табиғи және тарихи көрікті жерлерін белсенді аралайды, көбісі Бозжыра шатқалына ерекше қызығушылық танытады. Мысалы, тамыз айынан қазанға дейін Бозжираға 2 мыңға жуық адам келді», - деді өңір басшысы.
Жоспар бойынша келесі жылы бұл көрсеткіш 5 есеге артады. Демек, туристердің ретсіз және көптеп келуі табиғатқа үлкен зиян келтіреді. Сондықтан жолдар салынып, жалпы туристердің жайлы демалуы үшін жағдай жасау қажет.
Бозжыра шатқалы аумағында қонақ үй құрылысының жобасын Rixos қонақ үй кешенін іске қосқан инвестор ұсынды. Айта кету керек, қазіргі уақытта ешқандай құрылыс жұмыстары жүргізілмейді. Бүгінгі таңда жоба құру жұмыстар жүргізілуде. Жоба жасақталған бойда қоғамдық тыңдауларға ұсынылады. С.Трұмов жобалау кезінде міндетті түрде ескерілетін талаптардың бірін атап өтті. Ол «Бозжыраның азу тістері» деп аталатын шатқалдан 2 шақырым қашықтықта кешен салынатынын атап өтті.
Бұл көтерілген мәселе қоғам арасында қызу талқыға түсті. Ел Президенті бұл мәселеге қатысты да өз пікірін білдірді. Ол Қазақстанға өркениетті экологиялық туризм қажет екеніне тоқталып, бұл тиісті инфрақұрылымның, бірінші кезекте жайлы қонақ үйлердің болуын айтты. Сондықтан, Мемлекет басшысы Үкіметке қоғамдық кеңестердің, эколог-сарапшылардың және мемлекеттік мекемелердің келісілген пікірін ескере отырып, қонақ үй құрылысының жобасын қайта қарауды тапсырды.
Қоғамдық кеңес мүшелері құрылысқа қатысты да ойларын жеткізді. Олар өңірге осындай жоба қажет , бірақ ол жергілікті халықтың барлық талаптарын ескере отырып іске асырылуы қажет деген пікір білдірді. Сонымен қатар, табиғи байлықты, оның ішінде онда мекендейтін жануарларға зиян келтірілмей жасалуы қажет. Сондықтан, туристік кешен Маңғыстау халқының жергілікті мәдениеті мен өзіндік ерекшелігін сақтап қалуы қажет.
Жиын барысында, С.Трұмов бұл жобаның үлкен мүмкіндік екенін атап өтті. Ірі инвестор Маңғыстауда туризмді дамытуға үлкен қаражат салуда. Көптеген елдердің тәжірибесі көрсетіп отырғандай, біз туризмге көңіл бөле отырып, экономикамызды дамыта аламыз. Осылайша, шағын және орта бизнесті дамыту үшін мүмкіндіктер ашылып, жергілікті азаматтар арасында жұмыспен қамту мәселелері шешілетін болады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
