Маңғыстауда 5000-ға жуық жасөспірім әскери есепке алынады

Маңғыстау облысында азаматтарды шақыру учаскелеріне тіркеу басталды. Өңір бойынша 5000-ға жуық адамды әскери есепке алу жоспарланып отыр, - деп хабарлайды mangystaumedia.kz сайты.

«Әскери қызмет және әскери қызметшілердің мәртебесі туралы” ҚР-ның Заңына сәйкес тіркеу жылы он жеті жасқа толатын Қазақстан Республикасының ер азаматтары әскерге шақыру учаскелеріне тіркеледі.

Қазіргі уақытта жергілікті атқарушы органдардың шешімі бойынша азаматтарға медициналық куәландыру жүргізетін медициналық комиссиялар құрылды. Тіркеуден өту үшін шақырылатын азаматтар шақыру учаскелеріне уақытында және шақыру қағазында көрсетілген құжаттармен келуге тиіс.

Ақтау гарнизоны баспасөз қызметінің бастығы капитан Шалабаев Нұрболдың айтуынша, тіркеу процесінде қорғаныс істері жөніндегі басқармалар мен бөлімдер емделуге немесе медициналық бақылауға мұқтаж әскерге шақырылушылар анықталған жағдайда оларды емдеу-алдын алу ұйымдарына тіркейді. Есепке қою рәсімінен ойдағыдай өткен адамдарға шақыру учаскесіне тіркеу туралы куәлік беріледі.

Тіркеу науқаны барысында әскери есепке алғаш тұрған азаматтармен Қазақстан Республикасы Қорғаныс министрлігінің жоғары оқу орындарына түсу бойынша қосымша үгіт жұмыстары жүргізіледі. Жастарға келісімшарт бойынша әскери қызметтің артықшылықтары мен перспективалары туралы айтылады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.