Бұл туралы қоғамдық коммуникация орталығында өткен брифингте емхана директоры Нұрлан Мұқанов мәлім етті.
Оның айтуынша, қазір осы бағытта емхана ғимаратын қайта жарақтандыру жұмыстары жүріп жатыр. Желтоқсан айының соңына дейін Нидерланды, Ресей Федерациясы мен Нұр-Сұлтан қаласынан жоғары білікті дәрігерлер шақыртумен келеді.
«Көпсалалы емханамыздың кардиохирургиялық бағытта халыққа көрсететін қызмет түрлері мемлекеттік тапсырыс аясында жүргізіледі. Жалпы емхананың қызметі негізінен хирургиялық бағытта жасалатын күрделі операциялар жасауға негізделген. Атап айтсақ, дәрігерлеріміз жылына 120-дан астам жамбас және тізе-буынын ауыстыру оталарын және 70-ке жуық омыртқа операцияларын өткізеді. Сондай-ақ лапароскопиялық операциялар да жасалады» - деді ол.
Естеріңізге салсақ, «Sofiе Med Group» компаниясы Ақтауда 3-ші шағын ауданда тұрған бұрынғы көші-қон басқармасы ғимаратын мемлекеттік - жеке меншік серіктестік аясында күрделі жөндеуден өткізіп, көпсалалы емхана ашқан еді.
Қазіргі уақытта мұнда 1-3 шағын аудандардың, сондай-ақ Приморский тұрғын-үй алабының тұрғындарына кепілдендірілген тегін медициналық көмек және міндетті әлеуметтік медициналық сақтандыру аясында дәрігерлік көмек түрлері тегін көрсетіледі. Жалпы, осы аталған медициналық ұйымға 26 мыңнан астам адам тіркелген.
Жеке меншік емхана ұжымында қазір сұраныс жоғары мамандар, мәселен хирург, кардиолог, невропатолог, окулист, офтальмолог, фтизиатр сынды дәрігерлер қызмет атқарады.
«SOFIЕ MED GROUP» көпсалалы емханада мемлекеттік тапсырыс аясында тұрғындарға тегін медициналық көмекті екі бағыт бойынша көрсетіледі. Алғашқысы амбулаториялық, яғни емханалық, ал екіншісі стационарлық, дәлірек айтсақ кеңес беру-диагностикалық көмек болып бөлінеді. Стационарлық көмекке тоқталсам, жалпы емхана қызметінің 40 пайызы тегін медициналық көмек түрінде жүреді. Бұл, еліміздің денсаулық сақтау саласында бекітілген стандарттарға сәйкес жасалады» - дейді Н.Мұқанов.
Айта кетейік, Маңғыстау облысында 46 медициналық мекеме міндетті әлеуметтік медициналық сақтандыру (МӘМС) жүйесіне енген. Олардың 24-і жеке меншекте.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
