Маңғыстауда қысқы кезеңде автожолдарды күтіп ұстауға 226 тонна тұз қарастырылады, деп хабарлайды mangystaumedia.kz сайты Маңғыстау облысының қоғамдық коммуникация орталығына сілтеме жасап.
Маңғыстау облысы аумағындағы автомобиль жолдарының ұзындығы 2 947 км-ден асады. Оның ішінде Республикалық маңызы бар – 1 020 км, облыстық және жергілікті маңызы бар – 1 927 км.
Қысқы кезеңде облыстық маңызы бар автожолдарды күтіп ұстау үшін 69 бірлік техника, 125 тонна тұз, 850 тонна инертті материал құм түрінде қарастырылған. Республикалық маңызы бар автожолдар үшін 24 бірлік арнайы техника бар, сондай-ақ қысқы кезеңде жолдарды күтіп ұстау бойынша 101 тонна тұз, 560 тонна (1 591 м3) құм және 92 бірлік жол белгілері (30.10.2020 ж. дейін) дайындалады.
Сонымен қатар, республикалық және облыстық маңызы бар автожолдарда қар құрсауында қалған адамдардың өмірі мен денсаулығын сақтау мақсатында алдын ала 20 уақытша жылыту пункті дайындалды. Сондай-ақ, облыстың барлық қалалары мен аудандары бойынша 7 шұғыл әрекет ету жасағы құрылды. Аталған жасақтардың күштері мен құралдарының жалпы саны: жеке құрамы 730 адам және 265 бірлік техниканы құрайды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
