Ақтау тұрғыны қыста суға шомылудың қыр-сырымен бөлісті

«Бірінші байлық денсаулық», «Ауырып ем іздегенше, ауырмаудың жолын ізде» деген екен дана халқымыз. Адам баласының ең басты байлығы – ол денсаулығы, сондықтан күйбең тіршіліктің қамын күйттей бермей, күніне бір мезгіл спортпен шұғылданған абзал екені айтпаса да баршаға аян. Кейбір жандар тән саулығына қатты мән бере қыстың қытымыр аязына қарамастан, мұп-мұздай суға күмп етіп, денесін физикалық тұрғыда шынықтырып жатады. Аптаның жұмыс күндері бас алмастан қызмет атқарып сенбі-жексенбі күндері шаршағындықтан бой сергітіп, таң ата жұрт шырт ұйқыда жатқанда таза ауаға серігіп қайту үшін теңіз жағалауына серуендеп бара қалсаңыз әр-әр жерден айдынға түсіп жүрген жандарды кезіктіріп қаласыз.

Осы орайда, қызықты тақырыпты кеңінен жеткізу үшін бізге қыста суға шомылудың қыр-сыры туралы көп жылдар бойы суға түсуші морж, Ақтау қаласының тұрғыны Тұрар Әбдиев кеңінен тарқатып айтып берді.

- Адам баласы бір сәтке болса да өзіне әрі денсаулығына бейжай қарамай көңіл бөлуі қажет екенін білесіз. Бірі спортпен шұғылданса, енді бірі спортқа тәнті болмайды. Көп ретте ұзақ жасаудың қыр-сырын айтып жатамыз ғой, адам өз-өзіне ұқыпты қарап, таза ауада серігіп, тамақтану әдебі, ұйқы, көңіл-күйдің әсері осының бәрі адам ағзасына тікелей қатысы бар дүниелер екенін жақсы білесіздер. Әкем жарықтық «ақшаға бәрін сатып аларсың, бірақ денсаулық ешуақытта ақшаға берілмес» деп ылғи айтып отыратын еді. Сол сөз құлағымда осы күнге дейін жаңғырып тұрады. Мен Атырау облысы (бұрынғы Гурьев) Құлсары қаласының тумасымын. Ақжайықтың жағасында өскеннен болар теңіз, өзен, көл десе жаныма магниттей тартып тұрады. Киелі өлке, құлазыған маңғаз Маңғыстау жеріне жұмыс барысымен келгесін Каспий теңізіндей жерді алғаш көргенімде ерекше әсер сыйлағандай болған еді. Міне, енді 30 жылдың жүзі болып қалыпты, күні бүгінге дейін қысы-жазы теңізге түспей таң атырып, жұмысқа бармайтын «дәстүрмен» келемін. «Ауырып ем іздегенше, ауырмайтын жол ізде» деген ғой, ата – бабаларымыз. Сол сынды ауырмайтын жол іздеп, әр күн сайын жаттығулар жасап, таңертең ерте тұрып, теңізге барып 2-3 рет түсіп алып, жұмысқа жақсы көңіл күймен, мол энергиямен беттеймін. Бұл әдіс мен үшін үйреншікті дағдыға айналып кеткелі қанша жыл болды. Құдайға шүкір осы күнге дейін ешқандай ауырып көрген емеспін, - дейді көп жылдар бойы суға түсуші морж, Ақтау қаласының тұрғыны Тұрар Әбдиев ағамыз.

Айта кетейік, Тұрар Тәңкіліұлы - 1956 жылы Атырау облысы Құлсары қаласында дүниеге келген. Медицина оқуын тәмамдаған ол Маңғыстау түбегіне 1979 жылы жолдамамен шақырылып, облыстық стоматология емханасында ұзақ жылдар бойы жемісті еңбек етеді. Бүгінде зейнет жасына шыққан ағамыз, үйде отырмай кәсібін өркендетіп, Ақтау қаласында жеке стоматология орталығын ашып, халыққа қызмет көрсетіп келеді.

Иә, шынында бірінші байлық денсаулық – баға жетпейтін жалғыз ғана асыл дүние. Ол адам өміріндегі ең бағалы дүние болғандықтан, әр адам баласы өз денсаулығына көңіл бөле қарауы қажет, оны орынсыз ысырап етпеу керек, үнемі денсаулықтың қорын көбейтіп отыру керектігі даусыз.

Әлемге әйгілі ойшыл-данышпан әл-Фараби «Адам денесінің жетілуі - оның денсаулығы; егер денің сау болса, онда оны сақтамақ керек, ал егер сау болмаса, онда денсаулықты жетілдіру керек» дегендей, өз уақытында баға жетпес денсаулығына мән берген адам ұзақ ғұмыр кешудің кілтін табары сөзсіз. Денсаулыққа қазірден мән берейік!

Кенжебек СЕРЖАНҰЛЫ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.