Маңғыстауда Ақтау қаласының 60 жылдығына және облыстың 50 жылдығына арналған "Маңғыстау жұлдыздары" өнер фестиваліне қатысушыларды марапаттау рәсімі өтті. Қазылар алқасының шешіміне сәйкес Жаңаөзен қаласының әртістері Гран-при иеленді және жаңа Chevrolet Оnix автокөлігінің жүлдегері атанды, деп хабарлайды mangystaumedia.kz сайты Маңғыстау облысы әкімінің баспасөз қызметіне сілтеме жасап.
Фестивальде бірінші орын Ақтау қаласына бұйырды, облыс орталығының әртістеріне 4 миллион теңге көлемінде жүлде қоры табысталды. Мұнайлы ауданының әртістері екінші орынға ие болып, 3 миллион теңге алды, ал Бейнеу ауданы 2 миллион теңге көлемінде жүлдемен үшінші орынға ие болды. Маңғыстау, Қарақия және Түпқараған аудандары 1 миллион теңгеден ынталандыру сыйлықтарын алды.
Фестиваль 14 номинация бойынша өтті. Олар халық аспаптар оркестрі, домбырашылар ансамблі, халық аспаптарында орындау, дәстүрлі ән, вокалды орындау, классикалық музыка, эстрадалық музыка, хореография, әдеби шығармашылық, бейнелеу өнері, фотография, мобильді фотография, айтыс және үздік әдіскер номинациялары.
Өңір басшысы Нұрлан Ноғаев елдің әлеуметтік және мәдени дамуында "Маңғыстау жұлдыздары" сияқты өнер фестивальдердің маңызды екенін атап өтті. Сондай-ақ жүлдегерлерді марапаттап, барлық қатысушыны құттықтады.
- Өз жолдауында Қасым-Жомарт Тоқаев ұлттың рухани дамуы мәдениеттің қарқынды дамуымен тығыз байланысты екенін атап өтті. "Маңғыстау жұлдыздары" сияқты фестивальдер еліміздің әлеуметтік және мәдени дамуына ықпал ететін негізгі құралға айналуда. Биыл облысымызға 50 жыл, ал Ақтау қаласына 60 жыл толды. Биылғы фестиваль тақырыбы да осы маңызды мерекенің негізі болды. Осымен он үшінші рет ұйымдастырылып отырған байқау аймақта жаңа таланттарды ашып қана қоймай олардың өмірін түбегейлі өзгертуге ықпал жасайтын шаралардың бірі. Баршаңызды жүлделі орындармен тағы да құттықтаймыз, - деп атап өтті Нұрлан Ноғаев.
Биыл "Маңғыстау жұлдыздары" фестиваліне 2020 әртіс қатысты. Оларға арнап облыстың мәдениет үйінде 1500-ден астам жаңа костюм тігілді. Әр ауданда өткен шараларға жалпы есепте 4 мыңға жуық көрермен қатысты.
Биылғы фестивальдің тақырыбы - " Жыр-әнім сенсің-Маңғыстау!". Ол Ақтау қаласының 60 жылдығына, Маңғыстау облысының 50 жылдығына және көрнекті тұлғалардың мерейтойларына бағытталды. Атап айтқанда, Құрманғазы Сағырбайұлы, Ақан Сері Қорамсаұлы, Қайып Қорабайұлы, Досат Бәймембетұлы, Өришан Дарханұлы, Ұзақбай жырау, Зәкәрия Тұрниязұлы сияқты көрнекті тұлғалардың мерейтойларына арналды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
