Қазақстанда медициналық мекемелердің 40 пайыздан астамы ескірген

ҚР Денсаулық сақтау министрі Ажар Ғиният Үкімет отырысында Денсаулық сақтау нысандары инфрақұрылымының жай-күйі туралы айтып берді, деп хабарлайды mangystaumedia.kz.

"Бүгінде республикада 6 мыңнан астам мемлекеттік денсаулық сақтау нысаны, оның ішінде 492 аурухана және 5 695 алғашқы медициналық-санитарлық көмек нысаны халыққа медициналық көмек көрсетеді. Медициналық ұйымдар ғимараттарының тозу деңгейі 44,7% құрайды. Бұл ретте жұмыс істеп тұрған стационарлардың көпшілігі халықаралық стандарттар талаптарына сәйкес келмейді", - деді Ажар Ғиният.

Министр Мемлекет басшысының тапсырмасы бойынша ауылдық денсаулық сақтауды жаңғырту жұмыстары жүргізіліп жатқанын атап өтті.

"Бекітілген Ұлттық жоба шеңберінде 655 МСАК объектісін салу, сондай-ақ жарақтандыру, күрделі жөндеу, реконструкциялау жолымен 32 көпбейінді орталық аудандық ауруханаларды жаңғырту көзделуде. Бұл өз кезегінде ауыл тұрғындары үшін медициналық көмектің қолжетімділігін қамтамасыз етуге мүмкіндік береді", - деді Ажар Ғиният.

Бұл ретте Маңғыстау облысында орталық аудандық аурухананың құрылысы жүргізіліп жатыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.