Бүгін Маңғыстауға Денсаулық сақтау вице-министрі Олжас Әбішев іссапармен келді. Ол өңірдегі медициналық ұйымдарды аралап, ондағы міндетті әлеуметтік медициналық сақтандыру жүйесіне дайындығын тексерді, - деп хабарлайды mangystaumedia.kz сайты.
Денсаулық сақтау вице-министрі О.Әбішев алдымен Мұнайлы ауданындағы 250 ауысымға арналған емханаға барды. Ол медициналық сақтандыру мәртебесі анықталмай отырған 1877 адамның бар екендігін айтты.
Мамандардың айтуынша, Мұнайлы ауданы тұрғындарының тіркелген мекенжайында тұрмауы немесе көшіп кетуіне байланысты міндетті әлеуметтік медициналық сақтандыру мәртебесінің анықталуына өз кедергісін келтіреді.
Ал орталық емхана жұмысымен танысу барысында 23 маманның жетіспейтіндігін назар алды. Сондай-ақ ол Маңғыстау облыстық «Ана мен бала» перинаталдық орталығына барып, мекеменің міндетті әлеуметтік медициналық сақтандыру жүйесіне дайындығын тексерді.
«Облыстық «Ана мен бала» перинаталдық орталығы медициналық техникалармен жабдықталған. Дәрігерлер халыққа сапалы қызмет көрсетуі үшін жан-жақты жетіліп отыр. Маңғыстау өңірі республикада туу көрсеткіші бойынша алдыңғы қатарда. Былтыр өңірде 20 мыңға жуық бала дүниеге келді», - деп атап өтті орталық директоры Жамал Жаманбаева.
Содан кейін Олжас Әбішев «Нейрон» емханасындағы ахуалмен танысты. Мекеме директоры Нина Самаликованың айтуынша, емханаға 19 191 адам тіркелген. Ресми тіркелген тұрғындардың барлығы сақтандырылған.
Ал Ақтау қалалық №1 емхана міндетті әлеуметтік медициналық сақтандыру жүйесі бойынша жұмыстарды ақпараттық түсіндіруден бастағанын айтты. Бұл ретте вице-министр медициналық сақтандырудың әрбір аспектісі кеңінен түсіндіруді жалғастыра беру керек екендігін жеткізді.
Сонымен қатар вице-министр Олжас Әбішев облыс әкімінің орынбасары Қаныбек Жұмашевтың қатысуымен өткен міндетті әлеуметтік медициналық сақтандыруды енгізу бойынша дайындықты қамтамасыз ету жөніндегі жедел өзара іс-қимыл жөніндегі өңірлік штабтың отырысына қатысты.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
