Еңбек иелері құрметке бөленді

Жуырда Маңғыстау облыстық филармониясында Ауыл шаруашылығы қызметкерлері күніне арналған мерекелік шара өтті. Салтанатты шарада ауыл шаруашылығы саласының ардагерлері мен қызметкерлері ерекше құрметке бөленіп, мәртебелері асқақтады. Айта кетсек, бұл мереке осымен жиырма бірінші рет ұйымдастырылып отыр. Қазақстан аграрлық бағыттағы ел болғандықтан, республика көле­мінде ауыл шаруашылығы саласы­на соңғы жылдары көп көңіл бөлініп келе­ді. Тұңғыш Президент – Елбасы Нұрсұлтан Назарбаевтың «Әлеуметтік-­экономикалық жаңғырту – Қазақстан дамуының басты бағыты» атты Қазақстан халқына Жолда­уында ауыл шаруашылығы саласына, оның ішінде мал азығы өндірісі мен шалғайдағы жайылымдық мал шаруашылығын дамы­ту жөнінде нақты міндеттер көрсетілген еді. Бұл міндеттер елімізде жүйелі түрде жүзеге асырылу үстінде. Елдің ең басты рухани байлығы, асыл мұрасы да ауыл шаруашылығымен астасып жатыр. Ауыл шаруашылығының еселі еңбегіне беріл­ген лайықты бағамен мамандарының қос­қан үлесі де өлшеусіз. Шараға қатысқан Маңғыстау облысы әкімінің орынбасары Нұрлыбай Аққұлов сала қызметкерлері мен ардагерлерін төл мерекелерімен құттықтап, ізгі лебізін білдірді. «Құрметті ауыл шаруашылығы саласы­ның ардагерлері мен қызметкерлері! Сіз­дерді кәсіби мерекелеріңізбен шын жүрек­тен құттықтаймын! Ата-­бабаларымыздың дәстүрлі кәсібі – мал бағу ісі ұрпақтан­-ұрпаққа үзілмей жалғасып келеді. Елба­сы Н.Назарбаев: «Қай қоғамда да адам еңбегімен қадірлі. Кәсіп дегеніңіз – табыс­ты өмірдің өзі» деген болатын. Ауыл ша­руашылығы ел экономикасының негізгі драйверлерінің біріне айналып келеді. Сон­дықтан да ауыл шаруашылығын дамыту республиканың экономикалық-­әлеуметтік тұрғыда өсіп-­өркендеуіне, тұрғындардың әлеуетінің көтерілуіне зор үлес қосады. Осы ретте өңіріміздің ауыл шаруашылығы басқармасы Үкіметтің нақты тапсырма­ларына сай мал шаруашылығы мен егін шаруашылығын дамытуға күш салып отыр. Шағын және орта бизнесті барынша қолдау, оның ішінде несие ресурстарының қолжетімділігін арттыру, асыл тұқымды төрт түлік мал басын субсидиялау, ауыл шаруашылығы тауарларын өндірушілерге минералдық тыңайтқыштар мен су беруді субсидиялау сынды салмақты жұмыстар атқарылып жатыр», – деген Нұрлыбай Қаржаубайұлы өңірде ауыл шаруашылығын дамытуға бағытталған жұмыстар жайына тоқтала өтті. Оның айтуынша, бұл бағыт бойынша шаруа қожалықтарына қажетті құдықтар, су сорғыш құралдары, күн па­нелдері, су тұшытатын қондырғылар және басқа да ауыл шаруашылығы техникалары Үкіметтің қағидаларына сәйкес субсидияла­нып беріледі. Ауыл шаруашылығына 2019 жылы республикалық бюджеттен 1 млрд. 530 млн. теңге қаражат бөлінген. Бұл қара­жат 6 пайызбен шағын несие беруге арнал­ған. Қазіргі таңда өңірдегі ауыл шаруашы­лығы өнімдерінің жалпы көлемі – 13,5 млрд. теңге, оның ішінде егін шаруашылығына 2,7 млрд., мал шаруашылығына 10,1 млрд. теңге. Нақты көлем индексі – 100,1 пайызды құрайды. Жоспарға сай, жыл соңына де­йін жалпы шығарылым 17,7 млрд. теңге, ал нақты индекс көлемі 102,6 пайызды құрауы тиіс. Бүгінде мемлекет тара­пынан 550 млн. 263 мың теңге субсидия игеріліп, ол 372 шаруа қожалығына берілген. Мемле­кеттік бағдарламалардың сәтті жүзеге асуы нәтижесінде об­лыстың өндірістік көрсеткіш­терінде тұрақты өсім бар. Ауыл халқының тұрмыс деңгейі жақ­ сарып келеді. «Бүгінгі кәсіби мереке – кәсібін жермен байланыстырып, еңбек ететін, мал шаруашылығымен, азық-­түлік өнеркәсібімен айна­лысатын, халықты азық-­түлікпен қамтамасыз етуге өлшеусіз үлес қосып жүрген еңбеккер жан­дардың басын қосатын ортақ мейрам. Жерімізді дұрыс пайда­лана алсақ, бұл дегеніміз – таусылмайтын қазына, молайып отыратын зор байлық. Кезінде Маңғыстаудың ойы мен қыры, үстірт отар­-отар қой, үйір-­үйір жылқы болған еді. Мал өндірісін жандандыру – ата кәсіпті жаңғырту, ұлттық мұрат, мемле­кеттік мақсат. Осы орайда сіздерге өңіріміз­дің азық­-түлік қауіпсіздігін қамтамасыз ету жолында табанды еңбектеріңіз бен істеріңізге  адалдықтарыңыз, туған жер­ге деген сүйіспеншіліктеріңіз үшін алғыс білдіремін. Мерейлі мерекелеріңізде сіз­дерге зор денсаулық, қажымас қайрат, ша­ңырақтарыңызға бақ­-береке, әр бастама­ларыңызға сәттілік тілеймін. Ел несібесін арттырар игі қызметтеріңіз табысты бол­сын», – деді облыс әкімінің орынбасары. Салтанатты сахна төрінде облыстың ауыл шаруашылығы саласына сүбелі үлес қосып, еңбек сіңірген ардагерлер мен қызметкер­лер марапатталып, сый­-қошеметке бөленді. Атап айтар болсақ, ҚР Ауыл шаруашылығы министрлігінің «Еңбек ардагері» медалімен ауыл шаруашылығы саласының ардагері Жалмұрат Төлеген, «Ауыл шаруашылығы саласының үздігі» төсбелгісімен «Байбо­лат» шаруа қожалығының басшысы Тәжіхан Ізтұрова марапатталса, «Рысбек» шаруа қожалығының жетекшісі Жақсылық Ибадуллаев, «Мәтжан» шаруа қожалығының жетекшісі Манаш Қыдырқожа, сондай-­ақ  «Байсырымов» шаруа қожалығының же­текшісі Саламат Байсырымов, «Жаңаөзен сүт зауыты» ЖШС бас директоры Сәуле Жақаева, «Бейнеуветсервис» мекемесінің директоры Нұрәлі Сәдіғұлов министрліктің Құрмет грамотасын иеленді. Сондай-­ақ Маңғыстау облысы ауыл шаруашылығының дамуына қосқан үлесі үшін бірқатар шаруа қожалықтарының иелері облыс әкімінің алғыс хаттарымен марапатталды. «Құрметті әріптестер, баршаңызды кә­сіби мерекемен құттықтаймын. Егін ырыс таңдамайды, еңбек таңдайды. Ауыл ша­руашылығы – өндірістің ең маңызды түр­лерінің бірі. Бүгінгі мейрам – кәсібін жермен байланыстырып, мал шаруашы­лығымен айналысатын, азық-­түлік өнер­ кәсібінде жұмыс істейтін, еліміздің және өңіріміздің қажеттіліктеріне сай азық-­түлік өндірісі ісіне талмас үлес қосып жүрген еңбек иелерінің мерекесі. Ауыл шаруашы­лығы өсімдік және мал шаруашылығы де­ген екі үлкен салаға бөлінген. Жерімізді игілікке пайдалана білсек, бұл – таусыл­мас мұра, көбейе түсетін дәулет. Егінші­лік шаруашылығы Қазақстанның аграрлық секторының ірі саласы саналады. Ауыл шаруашылығындағы жалпы өнімнің басым бөлігі осы салаға тиесілі. Оның ішінде не­гізгі сала – дәнді­-дақылдар. Жалпы егін өндірісіндегі үлес көп пайызды құрайды. Сондықтан да ғалымдар мен фермерлер­дің алдағы егін шаруашылығына жаңа отандық дәнді­-дақылдар түрлерін өсіру міндеті тұр. Адамдардың экономикалық қызметінің көпжылдық тарихы мал және егін шаруашылығымен дамытуға арналған. Сіздерді бүгінгі төл мерекеде осынау ел игілігін арттыру жолындағы еңбектеріңізге жеміс тілеймін, кәсіптеріңіз өрлей берсін, еліміз өркендей берсін», – деп тілек білдірді «Байболат» шаруа қожалығының басшысы Тәжіхан Ізтұрова. Елдігімізді еселеп, мемлекеттігімізді нығайтқан сындарлы жылдар ішінде ауыл шаруашылығы саласы мемлекеттік қол­даудың арқасында жаңа деңгейге көтері­ліп, ел экономикасын дамыту мен ауыл халқының әл-­ауқатын арттыруда жетекші күшке айналды. Осындай жетістіктерге же­туге күш­-жігерін жұмсап, еселі еңбек еткен ардагерлер құрметіне сахна төрінде әннен шашу шашылып, қоңыр домбырадан күй төгілді. Мерекелік бағдарлама аясында ауыл шаруашылығы саласының арнаулы көрмесі ел назарына ұсынылды.

Жайық НАҒЫМАШ

Суреттерді түсірген Серік МАЙЕМЕРОВ

[gallery td_select_gallery_slide="slide" ids="88079,88080,88087,88081,88086,88082,88083,88085"]