Маңғыстау облысының әкімі Хорватия делегациясымен кездесті
[ 2019 ] 31 қазан, 05:54 | Экономика
Маңғыстау облысының әкімі Серікбай Трұмов Хорватияның Қазақстан Республикасындағы төтенше және өкілетті елшісі Рефик Шабанович бастаған делегациямен кездесті.
Қазіргі таңда Қазақстан елі Хорватиямен бірлесіп экономикалық саланың барлық бағыттары бойынша белсенді ынтымақтастық жүргізу үстінде. Маңғыстау облысында хорват капиталының қатысуымен көтерме сауда саласы бойынша «Антанир» ЖШС қызмет етеді. «Өлкеміздің экономикалық, инвестициялық, транзиттік әлеуетке ие аймақ болып табылатыны белгілі. Маңғыстау облысының аумағы арқылы Шығыс Еуропаны Орталық Азиямен және Солтүстік Еуропаны Парсы шығанағы елдерімен қосатын «ТРАСЕКА» және «Солтүстік – Оңтүстік» халықаралық көлік дәліздері өтеді. Бүгінгі таңда өңірде мұнай өндіру, мұнай химиясы, құрылыс материалдары, металлургия және т.б. салаларында өндіріс жүргізетін ірі шетелдік инвесторлар табысты жұмыс істеуде. Біз барлық мүдделі кәсіпкерлерге көмек көрсетуге дайынбыз және сіздерді өзара тиімді ынтымақтастыққа шақырамыз. Бүгінгі кездесу Маңғыстау облысы мен Хорватия арасындағы ынтымақтастықты одан әрі жандандырудағы тетік болады деп үміттенемін», – деп атап өтті облыс әкімі С.Трұмов.
Екі жақты кездесуде Маңғыстау мен Далматы (Хорватия) облыстарының мұнай және кеме жасау саласындағы ынтымақтастық мүмкіндіктері талқыланды. Сондай-ақ Хорватияның аймаққа шетелдік инвестицияларды тарту туралы ұсыныстары қаралды.
Қазақстан Хорватияны Оңтүстік-Шығыс Еуропадағы маңызды әрі перспективалы серіктесінің бірі ретінде қарайды. Әсіресе экономикалық ынтымақтастық деңгейін арттыру аса маңызды міндеттер қатарынан. Елімізде шамамен хорватиялық 30 компания жұмыс істейді екен.
Хорватия – Қазақстанмен әріптестікті дамытуға бейілді мемлекет. 2019 жылдың сәуірінде Хорватияның вице-премьер-министрі – Сыртқы және еуропалық істер министрі Мария Пейчинович-Буричтің Нұр-Сұлтан қаласына сапары барысында Хорватия Республикасының Қазақстандағы елшілігі ресми түрде ашылды.
Өткен жылы елордада алғаш рет Хорватияның елшілігі ашылды. Ал Рефик Шабанович Хорватияның Қазақстандағы тұңғыш елшісі болып тағайындалды. Елші бүгінде қазақхорват байланысын бекемдей түсуге кірісіп те кетті. Ал мамыр айында СплитскДалматин жупаниясының астанасы – Сплит қаласында Қазақстанның Құрметті консулдығы ашылды.
Биыл Қазақстан және Хорватия дипломатиялық қатынастардың орнағанына 27 жыл толды. Екі ел арасындағы алғашқы дипломатиялық қарым-қатынас 1992 жылы 20 қазанда орнаған. 1995–1997 жылғы каңтарда Алматы қаласында Хорватия Республикасының елшілігі ашылды. 2003 жылдан бастап Загреб қаласында ҚР консулдығы ашық. Ал 2007 ж. 19 желтоқсанда ҚР-дың елшігілін Хорватия мемлекетінде ашу туралы жарлыққа Қазақстан Республикасы Президенті қол қойды. 2017 жылғы мамырдан бастап Төлежан Барлыбаев Қазақстан Республикасының Хорватиядағы төтенше және өкілетті елшісі болып тағайындалды.
Жоғарғы деңгейдегі байланыстар аясында 2015 жылы екі мемлекеттің парламенттерінде екі жақты ынтымақтастық жөніндегі депутаттық топтар құрылды. Қазақстандық топты ҚР Парламент Мәжілісінің депутаты С.Абдрахманов, ал хорват тобын Сабор депутаты Ж.Лакович басқарады. Өзара тығыз ықпалдастықтар сыртқы саясат ведомстволарының жетекшілері арқылы жүзеге асуда.
Бүгінгі таңда Хорватия – Қазақстанның Оңтүстік-Шығыс Еуропадағы маңызды және перспективалы серіктесі. Нұр-Сұлтан мен Загреб арасында қарқынды саяси диалог қолдау тапқан.
Қазақстанның тұңғыш Президенті – Елбасы Нұрсұлтан Назарбаев 2001 және 2006 жылдары ресми сапарлармен Загребке екі рет барған еді. Хорватия президенттері Степан Месич пен Иво Йосипович Қазақстанға бірнеше рет сапармен келген. Сапар барысында Қазақстан мен Хорватия арасындағы өзара қарым-қатынастардың негіздері туралы декларацияға және екі жақты ынтымақтастықты дамыту үшін берік іргетасын қалаған басқа да маңызды құжаттарға қол қойылды.
Қазіргі уақытта жалпы күш-жігермен мемлекетаралық қатынастар жоғары деңгейге көтерілді. Сыртқы істер министрлігі желісі бойынша белсенді диалог қолға алынып, 2019 жылы Қазақстан мен Хорватия сыртқы саяси ведомстволарының басшылары деңгейінде үш кездесу өтті. Өңіраралық байланыстар, іскерлік және мәдени-гуманитарлық байланыстар беки түсті.
Қазақстан мен Хорватия мемлекеттерінің сыртқы сауда айналымы жыл өткен сайын өсу үстінде. Қазақстандық статистика мәліметтеріне сүйенсек 2018 жылы қос елдің сауда көлемі 350 млн. доллардан асқан көрінеді. Елімізде құрылыс, фармацевтика, медицина, тамақ өнеркәсібі және сауда салаларында ондаған Хорват компаниялары тіркелген. Ал сауда-экономикалық ынтымақтастықты одан әрі тереңдетуге Қазақстан–Хорват экономикалық ынтымақтастық жөніндегі үкіметаралық комиссиясының жұмысы ықпал етеді, оның бірінші отырысы 2020 жылдың басында жоспарланған.
Жайық НАҒЫМАШ
1398
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.