«КаспийТасЖол» зауыты 5 жылда 600 мың тонна асфальт өндірді
[ 2019 ] 22 қараша, 07:09 | Экономика
Ақтау қаласында 2014 жылы ашылған «КаспийТасЖол» компаниясы «Даму-Өндіріс-2» мемлекеттік бағдарламасы арқылы өз жұмысын бастаған. Қазіргі таңда «КаспийТасЖол» ЖШС өз жұмысын жүйелі жүргізіп жатыр. 20-дан аса компаниямен байланыс орнатып, өз өнімдерін ұсынады.
«Компания қазір ірі және ұсақ асфальт-бетонның 5 түрін және битумдық эмульсияны өндіреді. Алғашқы уақытта кәсіптің алға жылжуы үшін 194 млн теңге инвестиция салынған еді, ал бүгінде 750 млн теңгеге дейін артты. Сағатына 160 тонна өнім шығарады. Зауыт іске қосылғалы республикалық және облыстық маңызы бар автожол жол-құрылысына өнім жіберіп отыр», - дейді компания басшысы Ерболат Мергенбаев.
30-дай адам қызмет ететін зауыт 5 жылда 600 мың тонна асфальт шығарған. Мекеме басшысының айтуынша, өнімнің сапасы артқан сайын, сенім білдіретіндер көбейеді. Сондықтан басты мақсат – сапалы өнім шығару.
«Алдағы уақытта өз кәсібімізді одан әрі өркендетіп, жол құрылыс материалдарының түрін көбейтуді жоспарлап отырмыз», - дейді жоба жетекшісі Е.Мергенбаев.
Айта кетейік, 21 қараша күні Маңғыстау облысы «Даму» кәсіпкерлікті дамыту қоры БАҚ өкілдеріне арналған пресс тур ұйымдастырды. Мақсаты – мемлекет тарапынан қолдау тапқан кәсіпорындардың тыныс-тіршілімен таныстыру.
Жұлдызай ҚАЛИЕВА
Суреттерді түсірген Талант ҚҰСАЙЫН
1238
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
