Ақжігіт ауылы мерейлі тойын тойлады (2-бөлім)

Ақжігіт ауылының 50 жылдық мерейтойы тойланған екінші күнде бірнеше шара ұйымдастырылып, алғашқы салтанатты шараға Маңғыстау облысы әкімінің орынбасары Нұрлыбай Аққұлов қатысты, - деп хабарлайды mangystaumedia.kz сайты. Ауыл тұрғындары мен қонақтары ең әуелі ауылға есімі берілген Ақжігіт Бәкілікұлына зиярат жасап, құран бағыштады. Содан кейін жиылған жұрт ауылдық мәдениет үйінде осы ауылда өскен ақын Анар Шамшадинованың сөзіне жазылған «Алтын бесік – Ақжігіт» деп аталатын бейнероликті тамашалады. Салтанатты жиынға Ақжігіт ауылының тумасы, Маңғыстау облысы әкімінің орынбасары Нұрлыбай Аққұлов және Маңғыстау облыстық мәслихат хатшысы Нұри Тумышев пен облыстық мәслихат депутаты Аббат Өрісбаев қатысты. [gallery td_select_gallery_slide="slide" ids="86778,86779,86775"] Туған ауылының мерейтойына ортақтаса келген Нұрлыбай Қаржаубайұлы облыс әкімі Серікбай Трұмовтың құттықтау хатын ауыл әкіміне тасбыстады. Ақжігіт ауылының жарты ғасырлық мерейтойына орай ұйымдастырылған жазба ақындар мүшәйрасының жеңімпаздары жиын соңында марапатталды. «Ақжігітім – ауылым» деп аталған бұл мүшәйрада Бейнеулік Асылбек Жаңбырбай І орынды иеленіп, Анар Шамшадинова, Сәрсен Қадыр, Жандос Демесін, Тілеген Әли сынды ақындар жүлделі болды. Мүшәйраның бас жүлдесіне 250 000 теңге сыйақы табысталды. Одан бөлек, алғашқы кеңшар директоры Таушанбай Қорбақовтың қызы жүлдегерлерге «Тау тұлғалы Таушанбай» кітабын сыйға тартты. - І орын алғаныма қуаныштымын. Болашақта жастар жатқа оқитын өлең болса деп үміттенеміз. Кітапқа енгізейін деп жатыр екен. Ол да бір тарихи оқиға. Мүшәйраға қатысқан барлық ақындарға шығармашылық табыс тілеймін, осындай думанды тойларда бас қосып тұрсақ екен деймін, - деді мүшәйра жеңімпазы Асылбек Жаңбырбай. Еліне елеулі азаматтардың игі ісі мен ауыл өмірінің тамаша көрінісін сөзбен боямасыз суреттеген ақындардың өлеңіне ел тәнті болып, шайырларды шыңға балады. Ауылдың түтіні де тәтті демекші, дауыл тұрғанда үнемі көтерілетін шаңы мен ұдайы соғатын желін алыс-жақыннан келген Ақжігіттің тумалары сағынышпен естеріне алып, ауылдастарын көріп бір марқайып қалды. Нағыз шынайы өмірмен бетпе-бет келетін жер болар болса, ол – ауыл. Ешқандай жасандылықты қажет етпейтін, бірлігі жарасқан, талай тұлғаны бәйгеге қосып, азамат болып аяқтануына себепші болған ауылдың арқалағаны қашанда алғыс болмақ.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

[gallery td_select_gallery_slide="slide" ids="86770,86773,86771,86744"]