Ақтауда оқушылар мен мұғалімдер роботтарды жарыстырды

Ақтауда оқушылар мен мұғалімдерге арналған «РобоМаңғыстау-2019» байқауы өтті. Жарысқа информатика, физика, технология пәндерінің мұғалімдері мен 5-11 сынып мектеп оқушылары қатысты, - деп хабарлайды mangystaumedia.kz сайты. [gallery td_select_gallery_slide="slide" ids="74189,74188,74184,74190"] Байқау оқушылар арасында «көңілді саяхат», «роботтардың арқан тартысы», «басқарылатын роботтар футболы» жарыстарынан тұрды. Бір қызығы, «көңілді саяхат» жарысының шарты бойынша оқушылар робот машина арқылы картадағы әртүрлі кедергілерден сүрінбей өтіп, ең көп ұпай жинаған команда жеңіске жетеді екен. Сонымен бұл сайыста 1 орынды Ақтау қаласындағы №29 орта мектебінің  «Смарт» командасы иеленсе, 2 орынды Мұнайлы ауданы, №4 орта мектебінің  «Robopride» командасы алыпты. 3 орынды  Мұнайлы ауданы №7 орта мектебі мен қалалық №13 мектеп-гимназиясының «Жас қанат» командасы жүлделі болды. «Роботтардың арқан тартысы» жарысы – бұл қазақтың ұлттық «Арқан тартыс» ойынына қарап негізделген екен. Оқушылар басқарған роботтар артқа жүріп бір-бірін арқанмен тартуы қажет. Қорытындысында 1 орынды №20 орта мектебінің «Tesoglobal» командасы алса, 2 орынды Маңғыстау ауданы, Шетпе гимназиясының «Барыс» командасы иеленді. Ал 3 орынды Жаңаөзен қаласындағы №2 орта мектебінің  «Дарын»  командасы мен Ақтау қаласындағы "Оқушы" орталығының  «IdeaMan» командасы алды. Оқушыларға арналған 3-ші жарыс «Басқарылатын роботтар футболы» деп аталады. Ең көп гол соққан команда жеңіске жетеді. Бұл жарыста 1 орынды Ақтау қаласы №22 орта мектебінің «Robo World» командасы мен 2 орынды Түпқараған ауданындағы М.Əбдіхалықов атындағы мектеп-гимназиясының «Matrix» командасы иеленді. Ал Жаңаөзен қаласындағы «Оқушылар шығармашылық үйінің» "Viktory" командасы 3 орынға тұрақтаған. [gallery td_select_gallery_slide="slide" ids="74185,74186,74191"] Жетекші мұғалімдер арасында «Кегельринг», «Сумо», «Роботтардың арқан тартысы» сайысы өтті. «Кегельринг» жарысында мұғалімдер роботпен шар тастарды алаңқайдан шығарып тастау қажет болса, ал «Сумо» сайысында роботтар бірі екіншісін алаңнан шығарып тастауы керек. «Жарысқа барлығы 46 команда, 9 жетекші мұғалім қатысқан еді. Әр аудан мен қаладағы білім беру ұйымдарындағы мұғалімдер мен оқушылар өздерінің жасаған роботтарын сайысқа алып келген. Сайыста шамамен 70 робот болған.  Мақсат - роботтарды құрастыру және бағдарламалау, инженерлік ғылым саласындағы талантты оқушылар мен  жетекші мұғалімдерді анықтау. Қорытынды бойынша команда жетекшілері арасында 1 орынды Мұнайлы ауданы №4 орта мектебінің мұғалімі Қарлығаш Бекназарова алса, 2 орынды Түпқараған ауданы, Ақшұқыр мектеп-лицейінің мұғалімі Жұмагүл Юсупова иеленген болатын. Жүлделі 3 орынды Жаңаөзен қаласы, мектеп-гимназиясының мұғалімі Сүйлеймен Құлдан алды. Сонымен қатар үздік нәтиже көрсеткен жетекшілерге де номинациялар бердік. Алдағы уақытта бұндай сайыстарды ұйымдастырып тұрмақпыз», - дейді облыстық оқу-әдістемелік және қосымша білім беру орталығының тәрбие жөніндегі орынбасары Ақмоншақ Мамаева. Айта кетелік, Маңғыстау облысында  робототехниканы үйретудің әдісі бойынша  былтыр 125 мұғалім «Өрлеу» және НИШ базасында біліктілікті арттыру курсынан өтті.

Ақкенже БЕРКЕНОВА

Суреттерді А. Мамаева ұсынды