"Шахмат ханшайымы" Бибісара Yessenov University-де оқитын болды

«Шахмат ханшайымы», бес дүркін әлем чемпионы, ФИДЕ шебері Бибісара Асаубаева енді Yessenov University-де оқиды. Бұл жайында Бибісараның анасы Лияна Таңжарықова фейбук парақшасында жариялаған еді. «Ш. Есенов атындағы университетінің ректоры Берік Ахметов Бибісараға оқуға грант бергенін қуанышпен хабарлаймын», - деді Л. Таңжарықова. Бұл жайында толығырақ ақпарат білу үшін Ш. Есенов атындағы мемлекеттік технологиялар және инжиниринг университетінің баспасөз қызметіне хабарласқан едік. «2 наурыз күні ректор Берік Ахметов Бибісара Асаубаевамен кездескен еді. Сонымен қатар кездесуге жас шахматшы Э. Мамедов пен «Дебют» шахмат мектебінің директоры Анвар Шайхымов та қатысты. Жиын барысында университет басшысы Бибісараға Yessenov University колледжінде оқуға грант бөлгендігін айтқан еді. Ол 3 жыл 10 ай, «Ақпараттық технологиялар» мамандығында оқитын болады», - дейді университеттің баспасөз хатшысы Айтжан Шоқанов. [gallery td_select_gallery_slide="slide" ids="74096,74095"] Сонымен қатар кездесуде алдағы уақытта ректор шахмат ойындарына қолдау көрсетінін айтқан. Айтжан Шоқановтың мәлімдеуінше,  болашақта университет Дене шынықтыру және спорт факультетінде оқитын студенттер де шахматтан жаттықтырушы атты қосымша мамандықты алуы мүмкін. Кездесу соңында университет ректоры мен Б. Асаубаева арасында шахматтан достастық кездесу ойыны өтті.

Ақкенже БЕРКЕНОВА

Суреттерді түсірген Қадырбек Абитов

[gallery td_select_gallery_slide="slide" ids="74094,74093"]