«Жас батыр» спорт мектебі журналистерді Алғыс күнімен құттықтады

Көктеммен бірге келетін  1 наурыз – Алғыс күні Маңғыстау журналистері де құрметке бөленіп жатыр. Талай чемпионға жол ашқан облыстағы мамандандырылған балалар мен жасөспірімдер спорт мектебі – «Жас батыр» бүгін БАҚ өкілдерін арнайы шақырып, құттықтады.

Жиынға мектеп ұжымы, спортшылар, журналистер мен Маңғыстау облыстық самбо федерациясының президенті Айдос Ақжанов қатысты.

«Бізге үнемі қолдау білдіріп, демеп жүрген Маңғыстау облысы әкімдігіне, спорт басқармасына, барлық спорт федерациясына, жалпы біздің жұмысымызға белсене ат салысып жүрген азаматтарға алғыс айтамыз. Соның ішінде облысымыздағы үздік бапкерлерді, спортшыларды насихаттап, халыққа таныстырып жүрген бұқаралық ақпарат құралдары өкілдеріне көп рақмет. Мектебіміздің, спортшыларымыздың жетістігіне сіздердің де үлестеріңіз өте мол», - деді «Жас батыр» МБЖСМ директоры Манарбек Бисекенов.

Жылы лебізден соң мектеп басшысы тілшілерге Алғыс хаты мен сый-сияпаттарын табыс етті. Айта кетейік, аталмыш мектеп жақында ғана республикадағы үздік мектеп атанып, ҚР Мәдениет және спорт министрлігінің арнайы дипломымен марапатталды.

«Жас батыр» мектебінде дзюдо, самбо, волейбол, баскетбол, жекпе-жек сайысы, көркем гимнастикамен айналысып, білікті бапкерлерден дәріс ала алады. Осы 6 бөлімде 974 спортшы тәлім алады, оларға 34 жаттықтырушы-ұстаз дәріс береді. 25 жаттықтырушының жоғары, 9 жаттықтырушының орта-арнаулы білімі бар. Дзюдо мен самбо күресінен бөлек мектеп спортшылары жекпе-жек сайысында жоғары көрсеткіштерге ие.

Атап айтсақ, мектептің алты бірдей дзюдошысы Рамазан Мамаев, Бауыржан Нарбаев, Сұңғат Жұбатқан, Бауыржан Сағынғалиұлы, Ақниет Тұрдан, Әмірбек Жеңісов қазіргі таңда Қазақстанның ұлттық құрамасына енген. Нұркен Домбаев, Мұхаммед Зұлхарнаев, Нұрлыбай Серғазиев, Асхат Хапанов, Балнұр Аппазова сынды самбошылар халықаралық жарыстарда топ жарып, Қазақстанның туын желбіретіп жүр.

Спорт ошағы осы жылы 9 республикалық, 5 халықаралық өткізуді жоспарлап отыр.

Теңге БЕКМҰРЗАЕВА Суреттерді түсірген Ақерке ГАГАРИНҚЫЗЫ

[gallery td_select_gallery_slide="slide" ids="73786,73787,73788,73789,73791,73792,73793"]