Ақтауда Ғ.Құрманғалиевтің 110 жылдығына арналған кеш өтеді
[ 2019 ] 19 ақпан, 06:09 | Жаңалықтар
Кеңес Одағының халық әртісі, мемлекеттік сыйлықтың лауреаты, әнші Ғарифолла Құрманғалиевтің 110 жыл толуына арналған дәстүрлі әншілер кеші «Туған дала төсінде, ән боп туған мен балаң» деп айдар таққан.
М.Өскінбаев атындағы облыстық филармониясының ұйымдастыруымен өткелі жатқан кешке өнер майталмандары, әншінің шәкірттері келмек.
Кеш қонақтары – Орал қаласынан арнайы шақыртылған Ғарифолла Құрманғалиевтің төл шәкірті ҚР еңбек сіңірген қайраткері, «Парасат» орденінің иегері Қатимолла Бердіғалиев, ҚР Мәдениет саласының үздігі, «Құрмет» орденінің иегері Қайрат Кәкімов, Қазақ Ұлттық Өнер университетінің доценті, ғылыми өнер кандидаты Меруерт Құрманғалиева. Сондай-ақ Абыл Тарақұлы атындағы қазақ оркестрі мен әншілері де өнер көрсетеді.
«Елбасы Нұрсұлтан Назарбаев «Ұлы даланың жеті қыры»атты мақаласында төл тарихымызды жетік меңгеру және қадірлей білу елдің мызғымас кепілі, басымдығы екендігін ерекше атап көрсетті. Мақаланың «Тарихи сананы жаңғырту» бөлімінде «ұлы даланың ұлы есімдерін», яғни елге тұлға бола білген ата-бабаларымызды дәріптеу маңызды екенін айтты. Cолардың бірі, дарын иесі, әрбір қазақты әнмен әлдилеп, өмірін өнеріне, өнерін өміріне айналдырған, қайталанбас дара тұлға, біртуар өнер иесі – Ғарифолла Құрманғалиев», - дейді М.Өскінбаев атындағы облыстық филармония басшысының орынбасары Жаңылсын Ахметова.
Абыл Тарақұлы атындағы қазақ оркестрі көркемдік жетекшісі және бас дирижеры ҚР еңбегі сіңірген қайраткері Рахат Мадреев, Мәдениет саласының үздігі Ақмарал Ерімбетова, дирижер, Мәдениет саласының үздігі Айдарбек Оңайбаев, Республикалық дәстүрлі әншілер байқауының лауреаты Әзімхан Баймағанбетов, Мәдениет саласының үздігі Асқар, Асанәлі Көшеровтер, ҚР мәдениет қайраткері Бауыржан Сатыбалдин, Республикалық дәстүрлі әншілер байқауының лауреаты Айнұр Омарова, «Жеті қайқы» республикалық дәстүрлі әншілер байқауының бас жүлдегері Сәбит Шектібаев т.б. халық әртісінің туындылары мен күйден шашу шашпақ.
Сан сахнада ұлттық музыкалық салт дәстүріміздің байлығын паш еткен дүлдүл әншіге арналған кеш 20 ақпан 19:00-де Н.Жантөрин атындағы Маңғыстау облыстық драма театрында өтеді.
https://www.youtube.com/watch?v=aBfxZhreTDc&feature=youtu.be
2053
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
