Самбодан ҚР чемпионатында Маңғыстау құрамасы топ жарды

Ақтауда Самбо күресінен 2001-2002 жж. туған жасөспірім ұл-қыздар арасында Қазақстан Республикасы чемпионаты өтті. 14-17 ақпан күндері «Маңғыстау Арена» спорт кешенінде өткен жарысқа еліміздің 500-ге жуық спортшы қатысты. Командалық есепте ұлдар арасында Маңғыстау құрамасы, қыздар арасында Қызылорда самбошылары көш бастады.

Маңғыстау облысының намысын 20 ұл, 10 қыз қорғап, олар 3 алтын, 2 күміс, 3 қола медалді қоржынға салды. 48 келіде Нұрсұлтан Жұбатқан, 56 келіде Дәурен Төлегенов, 70 келіде  Нұрбек Қуанышұлы чемпион атанса, 48 келіде Айкүн Раxметова мен 56 келіде Айбек Сайлаубаев күміс қанжығалады. Ал 44 келіде Айгерім Еламанова мен 44 келіде  Мерейлім Кеңесбек және +87 келіде Мұxамбет Зұлxарнаев қоланы қанағат тұтты.

Ал командалық есепте Маңғыстау – 1 орын, Алматы облысы – 2 орын, Атырау облысы – 3 орын иеленді.

"Самбошыларымыз алғаш рет халықаралық жарысқа 2012 жылы қатысты. Сол жылы Саха Республикасының Якутск қаласында «Азия балалары» жарысы өткен еді. Сонда палуанымыз Сұңғат Жұбатқан жеңімпаз атанды. Былтыр Ресейдің Рязань қаласында өткен жасөспірімдер арасындағы жарыста Нұрсұлтан Жұбатқан, Төрекен Қобланов, Дәурен Төлегенов, Абылай Қабылқақ алтын жүлде алды. Таразда өткен сайыста да 6 палуанымыз жүлдеге ілікті", - дейді «Жас батыр» спорт мектебінің директоры Манарбек Бисекенов.

Соңғы жылдары өңір самбошылары Әлем чемпионатынан 10, Азия чемпионатынан 11 жүлде еншілеген. 2018 жылы 70 палуан спорт шеберлігіне үміткер болса, 10 спортшы спорт шебері атанды. Оларды ҚР еңбек сіңірген жаттықтырушылары – Берік Жұмағалиев, Айбек Бисекенов, Серік Бөкенбаев, Нұржан Айданғалиев баптаған.

Турнир жеңімпаздары маусым айында Тайпей қаласында (Тайвань) өтетін Азия чемпионатына, сондай-ақ қазан айында өтетін Ташкентте (Өзбекстан) өтетін Әлем чемпионатына жолдама алады.

Мамыр айында жауынгерлік самбодан Ақтау Кубогы, тамызда ересектер арасында (23 жасқа дейінгі) чемпионат өту жоспарланған.

[gallery td_select_gallery_slide="slide" ids="72532,72533,72534,72535,72536,72537,72538,72540,72541,72543,72545,72547,72548,72550,72551,72552,72553,72554,72555,72556,72557"]