Қос елдің жолын қосты

Сенбі күнгі Елбасы Н.Ә.Назарбаевтың қатысуымен өткен телекөпірде «Бейнеу-Ақжігіт-Өзбекстан республикасының шекарасы» республикалық маңызы бар автокөлік жолының жобасы іске қосылды. Бұл Бейнеу ауданы үшін де қуанышты оқиға болды.

Телекөпірде Елбасы сөз сөйлеп, елімізде «Нұрлы жол» бағдарламасы аясында жүзеге асып жатқан жобалар Ұлы Жібек жолын жаңғыртып, Парсы шығанағы мен Европаға жол ашатын халықаралық маңызға ие, елдің әлеуметтік-экономикалық дамуына оң ықпал екендігін айтып, жобаның іске қосылуына сәттілік тілеп, рұқсат берді.

Содан соң Өзбекстан Республикасынан келе жатқан жүк автокөліктері шерулетіп, тас жолмен сапарларын жалғастырды. Шараға жиналған көпшіліктің қуанышында шек болған жоқ.

Телекөпір аяқталған соң жол құрылысшыларын аталған шарамен тұспа-тұс келгенқұрылысшылар мерекесімен «ҚазАвтоЖол»ҰК АҚ-ның басқарма төрағасы Е.Қизатов, Бейнеу ауданының әкімі Б.Әбілов, «Теміржол жөндеу» ЖШС-нің бас директоры Е.Қарсыбеков құттықтап, бір­неше құрылысшы-мамандарға Құрмет грамотасы мен Алғыс хаттарын табыс етіп, марапат­тады. Құттықтаушылар олардың жол құрылысына аянбай атсалысып жүргендеріне және телекөпірдің ойдағыдай ұйымдастырылуына қосқан үлестері үшін ризашылық білдірді.

Қазіргі кезде мамандардың айтуына қарағанда, күн сай­ын жолдан 1000-дай автокөлік өтуде. Жол толықтай пайдалануға берілген соң өтетін көлік саны 7000-ға дейін же­теді деген болжам бар. Жол құрылысында 600-дей адам еңбек етуде. Жұмысшылардың басым бөлігі — ауыл тұрғындары. Олар жолды жыл соңына дейін толықтай, сапалы аяқтау үшін қызу жұмыс жүргізуде. Жұмысқа арнаулы техни­калар жұмылдырылған.

Өткен жылдан басталған жол жобасы не­гізінде жол бойында жолаушыларға сервистік қызмет көрсететін орындар салу көзделген. Қазіргі таңда, әсіресе қыс мезгілінде жол­да қалып қойған жолаушыларға көмек беру мақсатында жылыту үйі пайдалануға берілген. Оның ішінде жатын орны, асхана жұмыс істейді.

Аталған жолдың іске қосылуы республикалық маңызға ие болумен қатар ауыл тұрғындарының әлеуметтік-әкономикалық жағдайының жақсаруына да ықпал етеді.

Кәрісбай ӘДІЛ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.