©
Каспий теңізінің Қарақия ауданы тұсындағы қайраңға келіп тоқтаған Аракс кемесін тазалау жұмыстарының басталғанын бұған дейін жазғанбыз. Ол мәлімет бойынша тазарту шаралары екі аптадан соң, яғни 23 қазанда аяқталуы тиіс еді. Дегенмен алып кемедегі мұнай қалдықтары шығару әлі жалғасып жатыр. Осыған байланысты МО табиғи ресурстар және табиғатты пайдалануды реттеу басқармасына хабарластық.
- Аракс кемесін тазалау жұмыстары қазан айында басталды. Бекітілген іс-шаралар бойынша бітіру мерзімі 2 апта деп көрсетілген еді. Дегенмен ауа-райының қолайсыздығына байланысты ол уақыт ұзартылды. Толқын күшейіп, жұмысшылардың кеменің жанына барып тұруына, жұмыс істеуіне өте ыңғайсыз болды. Біз бірінші кезекте қызметкерлердің, яғни, жұмысшылардың қауіпсіздігін сақтауымыз қажет. Кемеден қазір шамамен 400 тоннадан астам мұнаймен ластанған су сорылып алынды. Негізі байқау жариялаған кезде тазарту жұмыстарының шекті мерзімі 30 қараша деп бергенбіз. Сол уақытта аяқталғанын қалаймыз. Егер ауа-райы күрт өзгерсе, одан әрі ұзартылуы мүмкін, - деді МО табиғи ресурстар және табиғатты пайдалануды реттеу басқармасы басшысының орынбасары Есенқос Әділбаев.
Еске сала кетейік, Аракс кемесінің палубасында мазутпен ластанған сұйық құйылған 15 бөшке, оның ішінде 10 екі жүз литрлік және жартылай кесілген 5 екі жүз литрлік бөшке бар. Кемедегі құрамында мұнай бар заттармен ластанған қалдықтар көлемі – 930 тонна.
Теңге БЕКМҰРЗАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
