©
Сербияда жастар мен жасөспірімдер арасында самбо күресінен тұңғыш Әлем чемпионы атанған Рамазан Мамаев пен Хорватияда жастар арасында дзюдодан өткен Әлем чемпионатының тұңғыш қола жүлдесін иеленген Бауыржан Нарбаевты жанкүйерлері мен ата-анасы әуежайдан үлкен қошеметпен күтіп алды. Қазақ көйлек киіп, сәнденген арулар балуан мен оның бапкеріне бауырсақ пен шұбат ұсынып, дәмнен ауыз тигізді.
- Елге келгенде осындай құрмет көрсетіп, бізді күтіп алып жатқан жерлестеріме дән ризамын. Маған үміт артып, жарысқа дайындаған бапкерлеріме, ата-анама, жанкүйер болған қазақ еліне алғыс айтамын. Ел намысын абыроймен қорғап, Маңғыстауымның атын әлемдік додада танытқаным үшін өте қуаныштымын. Ендігі мақсат-Олимпиада шыңын бағындыру. 9 жасымнан бастап бауырына алып, қамқорлығын көрсетіп, дзюдо мен самбо күресінің қыр-сырын үйреткен бапкерім Манарбек Бисекеновке алғыс айтамын. Мені жастайымнан спорт залға жетелеп әкелген әкем Қуанышбекке, жарыстарға дайындаған бапкерлерім Берік, Ерлан, Сергей ағайларыма ризашылығымды білдіремін. Алдағы жарыстарда алтыннан алқа тағып, елімнің көк байрағын әлі талай желбіретіп, әнұранымызды өзге мемлекеттерде шырқатамын деп сенемін. Мен бағындыратын белестер әлі алда,-дейді облыстық «Жас батыр» мамандандырылған балалар мен жасөспірімдер спорт мектебінің шәкірті Рамазан Мамаев.
Естеріңізге сала кетейік, жастар мен жасөспірімдер арасында самбо күресінен Әлем чемпионы Сербияның Нови-Сад қаласында өтті.
Байрақты бәсекеге 50-ден астам мемлекеттің самбошылары қатысып, бақтарын сынады. Аталмыш жарыста 62 салмақта белдескен жерлесіміз Рамазан Мамаев қарсыластарының барлығын айқын басымдылықпен тізе бүктіріп, Маңғыстаудың тарихында самбо күресінен тұңғыш Әлем чемпионы атанды.
Алғашқы белдесуінде Рамазан нидерландық қарсыласынан 8:0 есебімен таза жеңіске жетіп, болгариялық балуанды ауырту әдісімен тізе бүктірді. Ақтық сынға жолдама алу үшін тәжікстандық балуаннан 5:1 есебімен айласын асырып, финалда 3:1 есебімен моңғолиялық балуанның уысынан жеңісті суырып алды. Осылайша, болашағынан үлкен үміт күттіретін ол сенімді және жойқын әдістері арқылы рекордты жаңартып, чемпиондық тұғырға көтеріліп, алтын медальмен апталды.
Ал, Хорватияда өткен жастар арасындағы дзюдодан Әлем чемпионатында маңғыстаулық балуан, облыстық «Жас батыр» мамандандырылған балалар мен жасөспірімдер спорт мектебінің шәкірті Бауыржан Нарбаев қола медальға қол жеткізді. Боз кілемге 55 келі салмақта шыққан жерлесіміз алдымен колумбиялық балуанды «базари» әдісімен ұтқан. Одан кейін кореялық, ресейлік қарсыластарының жауырынын жер иіскетіп, келесі кезеңге жолдама алған. Жартылай финалда грузиялық балуанға есесін жіберіп, үшінші орынға қазақстандық балуанмен белдесіп, «базари» әдісімен тізе бүктірген. Осылайша, жерлесіміз жастар арасындағы дзюдодан Әлем чемпионатында қола медальдің иесі атанды.
-Бұл жолы еншіме бұйырғаны қола медаль болды. Намысты қолдан бермеуге тырысып, барымды салып күрестім. Жарысқа дайындаған бапкерім Манарбек Бисекеновке алғыс айтамын,-дейді Бауыржан Нарбаев.
Венера МИРЛАН Суреттерді түсірген Талант ҚҰСАЙЫН, Ақерке ГАГАРИНҚЫЗЫ
[gallery td_select_gallery_slide="slide" ids="40268,40260,40266,40256,40264,40259,40265,40261,40269,40263,40258,40262,40257,40270,40248,40247,40250,40253,40252,40245,40246,40251,40249"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
