Ағымдағы жылдың 9 айында облыс бойынша 4661 қылмыс тіркелген. Қылмыс көлемі былтырғы жылмен салыстырғанда 20%-ға төмендеген. Бұл туралы сотқа дейінгі қылмыстық іс жүргізудің заңдылығын қадағалау басқармасы басшысының орынбасары Жандарбек Қуанышұлы мәлімдеді.
- Тіркелген қылмыстардың 768-і кішігірім ауырлықта, 2532 орташа, 656 ауыр және 41 аса ауыр. Қылмыстардың ашылуы 76,9 % көрсетті. 2857 қылмыстық іс аяқталған, оның ішінде 1582 іс сотқа жолданып, 3583-і қысқарған. 1765-і өндірістен тоқтатылған. Қазіргі таңда 366 адамға қатысты кепіл бұлтартпас шаралары қолданылды. Облысымыз бойынша 15 қасақана адам өлтіру фактісі тіркелді. Былтыр 26 болған, яғни, биыл 42%-ға төмендеген, - деді ол.
Аталған қылмыстар салдарынан мемлекетке 3,5 миллиардтан астам шығын келген. Тергеу барысында оның өндірілгені – 1,5 миллиард. Сондай-ақ бұрынғымен салыстырғанда прокуратураға түсетін арыз көлемі 25%-ға азайған.
Өткен жылмен салыстырғанда адам өлімі 42%-ға, ұрлық 16%-ға, қарақшылық әрекеттер 28 %-ға төмендеген.
Облыстық прокуратура тарапынан аймақта бірнеше шаралар жүргізіліп, жобалар қолға алынды.
- «Құмар ойындарынсыз Маңғыстау» жобасы аясында 73 заңсыз обьекті анықталып, оның 55-і жауапқа тартылды. Қалғандары өз еріктерімен жұмысын тоқтатты. Сондай-ақ, «Стоп Браконьер» жобасы аясында 31 қылмыстық факт тіркеліп, 18-і сотқа жолданды. 13 іске қатысты сотқа дейінгі тергеу жұмыстары жүргізіліп жатыр, - деді әлеуметтік-экономикалық саладағы заңдылықты қадағалау басқармасы бастығының орынбасары Мақсат Көшбаев атқарылған жұмыстар жайында.
Сондай-ақ, 9 айда 8 мыңнан астам азаматтық және 12 мыңнан астам әкімшілік іс қаралған.
Мемлекет пайдасына сомаларды, еңбекақы төлемдеріне алименттерді уақытылы өндіруге ерекше көңіл бөлінді. Еңбекақы төлемдері туралы қарыз бойынша 72,2 млн. теңгенің 63,3 млн. теңгесі шара алу арқылы төленген.
«Алименттер. Төлемеуге қарсы 30 қадам» жобасын жүзеге асыру барысында 93 млн. теңге көлемінде алимент борышы өндірілді.
Теңге БЕКМҰРЗАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
