Түпқарағанда қарттар күні қайырымдылық шара өтті

1 қазан күнін еліміз қарттар күні деп атап өтеді. Бұл күнде көптеген теле-радио бағдарламалар қариялардың талғамына сай назарға ұсынылып, түрлі құттықтаулар арналып, жергілікті биліктің ұйымдастыруымен, компаниялар мен тарапынан қайырымдылық шаралары ұйымдастырылады. Түпқараған аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі» ММ-сінің бастығы Г.Берішбаева осы жылы жергілікті өндірістік мекемелерге хабарласып, жалғызілікті және тұрмысы күнкөріс деңгейінен төмен отбасындағы қарттарға мерекеге орай көмек көрсетуіне хат жолдағанын айтты. «Жолданған хат нәтижесінде «Шегендеу сервис» ЖШС, «Енка ИНШААТ Ве Санайи» компаниясы, «Теңіз Сервис» ЖШС, «КСОІ» және «Вагенборг» мекемелері көмек қолын созып, аудандағы 32 аталған қарттарға азық-түлікпен мерекелік тәттілерін арнап құттықтады. Қарттарға немқұрайлылық танытпай, мерекелік лебіздерін білдірген мекеме ұжымдарыма алғысым шексіз», - деді Г.Берішбаева. Көмек көрсетуге атсалысқан «Шегендеу сервис» ЖШС-нің басшысы жергілікті жердің тумасы, депутат Айтқали Төлеумағанбетов бұндай көмектерден аянған емес. «Оң қолым бергенді сол қолым білмесін» дегенді ұстанатын ел азаматы осы жолы да қарттарына өзінің сенімді көмекшілерінен азық-түліктер мен тәттілерін беріп жіберіп,  риза қылды. Қайырымдылық шарасы барысында көзімізбен көріп, куә болғанымыз – барлық мекемелердің ішінен мерекелік тартуды ауқымды жасаған да осы мекеме ұжымы. Біздің мақсатымыз – бір мекемені түсіріп, екіншісінің абыройын асқақтату емес. Осы өңірдің тумасы, еліне жанашыр азаматтардың бар екенін таныту, бар болса азаматтың ауыз толтырып айтар жақсылығы да қатар жүрсін деген үлгіні көрсеткіміз келді. Қарттар күнін мерекелеудің шығу тарихына тоқталсақ, «Халықаралық қарттар күні 1991 жылдан бастап аталып өтеді. Мерекені тойлау туралы қаулы БҰҰ-ның Бас Ассамблеясында 1990 жылы 14 желтоқсанда қабылданған. Алғашында бұл мейрамды Еуропа елдерінде атап өтсе, кейін АҚШ-та, ал, 90-шы жылдардың соңына қарай бүкіл әлімде тойланып келеді. Халықаралық қарттар күнінде әлем елдерінде арнайы тақырыпта түрлі шаралар ұйымдастырылады. Бұл мереке, әсіресе, скандинавия елдерінде кең көлемде аталып өтеді», - дейді интернет көздері. Ал біз «қарты бар үйдің қазынасы бар» дегенді туғалы естіп өскен ұрпақпыз. Қарттарға деген құрмет жүрегі елім деп соққан әрбір азаматтың бойынан табылары анық. Себебі біз – кешегі аталардың бүгінгі жалғасымыз. Жердің дөңгелек екені ғылыми түрде дәлелденсе де, оны атам қазақ бұрыннан бері білген. Сондықтан «жер дөңгелек, атаңа не қылсаң, алдыңа сол келер» деп бекер айтпаған. Бұл біздің бір күн емес, өмір бойына ата ұрпаққа қарыздар екенімізді білдіреді.

Клара ҚАНСҰЛТАНОВА