14-16 тамыз аралығында Орал қаласында самбо күресінен 23 жасқа дейінгі балуандар арасында КСРО чемпионы, Әлем кубогының иегері, ҚР еңбегі сіңген спортшы Асқар Шайхиевті еске алуға арналған халықаралық турнир өтті. Оған Қазақстан, Ресей, Өзбекстан, Тәжікстан мемлекеттерінен 170-ге жуық балуан қатысып, 10 салмақ бойынша боз кілемнің көркін қыздырды.
Аталмыш жарысқа Маңғыстау облыстық «Жас батыр» мамандандырылған балалар мен жасөспірімдер спорт мектебінің 5 спортшы қатысып оның 2-уі жарыс жүлдегері атанды. 57 келі салмақта белдескен Аманбек Құлқаев қола медальді иеленсе, 90 келі салмақта өнер көрсеткен Қанағат Қойжан күміс медальді қанжығалады. Қуанышты жаңалықпен балуандарды жарысқа дайындаған белгілі бапкерлер Берік Жұмағалиев пен Ерлан Серіков бөлісті.-Сәтті өнер көрсеткен қос балуанымызды кезекті жеңісімен құттықтаймын. Аманбек Құлқаев 6 кездесу өткізіп, шешуші сәтті тәжікстандық балуанға есесін жіберіп, қола медальдің иесі атанды. Қанағат Қойжан болса 4 кездесуін сәтті аяқтап, финалда ақтөбелік балуанға ұтылды. Жарыс өте жоғары деңгейде өтті. Турнирде 48 келі салмақта жеңімпаз атанған оралдық Ерасыл Бақытқа жерлестерінің атынан 500 АҚШ доллары табысталып, балуанға ұйымдастырушылар арғымақ мінгізді. Сондай-ақ осы турнирге Әлемнің 3 дүркін чемпионы Асхат Шахаров пен Әлемнің 4 дүркін чемпионы Ерболат Байбатыров қатысып, жарыс қатысушыларына сәттілік тіледі,- дейді Ерлан Серіков.
Венера МИРЛАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
