Маңғыстау делегациясы облыс әкімі Ералы Тоғжанов бас болып, Қабанбай батыр мазары маңында жерленген киелі түбектің төл перзенті, замана заңғары Әбіш Кекілбайұлы мен жыр патшайымы Фариза Оңғарсынованың зиратына тәу етіп, рухына құран бағыштады. Қабір басына гүл шоқтарын қойып, көзі тірісінде есімі бүткіл елге мәшһүр болған тарлан тұлғалардың өнегелі өмір жолын еске алысты.
«Қазақтың маңдайына біткен қос жұлдыздың рухына құран бағыштадық. Данышпан тұлғалардың рухы желеп, жебеп жатқай», -деді Маңғыстау облысы әкімі Ералы Лұқпанұлы.
Әмин Тұяқов, Әнес Сарай, Қайролла Ережепов, Светқали Нұржан сынды ел азаматтары іс-шараның мән маңызын атап өтіп, оң бастамаға ризалығын білдірді. Сондай-ақ, қаламгерлер, халық қалаулылары, этономәдени бірлестіктердің өкілдері, студенттер мен Астана тұрғындары шараға атсалысты.
«Бұл қасиетті топырақ. Кемеңгер Кекілбаевтың, поэзия дүлділі Фариза апамыздың зираты жатыр. Зиярат қылу соңғы уақытта дәстүрге айналып келеді. “Өлі жібімей, тірі байымайды” деген қазақтың сөзі бар. Әбіш аға Астананың сокралдық орындарын көбейту керек деп сан мәрте айтқан еді. Осы жерге келгеннен кейін бір тіземізді бүгіп, зиярат етіп кетпесек, бір нәрсені жоғалтқандай болып тұрамыз. Өткенді жаңғырту арқылы ғана ертеңіңді тірілте аласың. Осы сапарымызды өткенді еске алудың жоралғысы деп есептеймін. Кейінгі ұрпақ осы ізден жаңылмасын деген тілегім бар»,- деп атап өтті белгілі ақын Светқали Нұржан.
Голрох ЖЕМЕНЕЙ
[gallery td_select_gallery_slide="slide" ids="32772,32770,32767,32768,32762,32764,32765,32766,32771"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
