«Отан Ана» монументі – татулық нышаны

Еңселі Елорда,  ерке Есіл. Жол бойы жайқала өскен жасыл желек, қызылды жасылды  гүлдерден көз тұнады. Әсем ғимараттар, инновациялық сәулет туындылары, бедері ерек ескерткіштер, мәдени, әдеби, рухани ордалар бас қала көркін асыра түседі. Күмбезі көк тіреген, көркі көз жауын алар Елорда төрінде маңғаз Маңғыстау өңірінің мәдениет және өнер күндері басталды. Маңызы зор, ауқымы кең іс-шара тарих тереңіне бойлап, бағзыға тағзым етуден бастау алды. Маңғыстау топырағында туып-өскен, түлеп ұшқан кіл жақсы-жайсаң, беделді ел азаматтары мен билік өкілдері Отан-Ана монументі маңында бас қосты. Тәуелсіздік, батыр бабалар рухына тағзым, ерлік пен елдік, бірлік пен бейбітшілік сынды киелі ұғымдарды астарына сыйғызған монументке гүл шоқтарын қойып, ата-баба рухына тағзым етті. Майдан даласында құрбан болған жандарлы еске алып, бір сәт үнсіздік жариялады.

«ЭКСПО» халықаралық көрмесінің Астанада өтуі -  ел үшін ерекше оқиға. Алыс жақын елдерден халық ағылып, келіп жатыр. Сондай ақ, Елордада Маңғыстау өңірінің мәдениет күндері өтуде. Маңғыстау түбегі керемет табиғатымен, терең тарихымен ерекшеленеді. Маңғыстаудың жетістіктері мен өнерін тек қазақстандықтарға ғана емес шетелдік азаматтарға да паш ету мүмкіндігіне ие болып отырмыз. «Отан Ана» монументі бейбіт өмір, татулық пен бірлікке жетелейді. Алдымен осы монументке келіп, тағзым ету өте жақсы бастама деп б3лем3н», -дейді қазақ спортының даңқты тұлғасы Әмин Тұяқов.

Сондай-ақ,  Маңғыстау облысы жағалық-күзет өңірілік басқармасының 2201б, 2201а, 2018 әскери бөлімдерінің сарбаздары саптық маршпен “Отан Ана” монументіне гүл шоқтарын қойды.

«Біз арнайы іс-шараға үлкен дайындықпен келдік. Ата-баба рухына тағзым ету - келер ұрпақ парызы. Елін- жерін қорғап, жанын пида еткен жауынгерлер, тату тірлік пен береке-бірлікті сақтау жолында қаза тапқан жандар зор құретке лайық»,- дейді сарбаз Тимур Сүлейменов.

  Голрох ЖЕМЕНЕЙ

[gallery td_select_gallery_slide="slide" ids="32735,32727,32731,32728,32729,32730,32736,32737"]