Нұрмұхан Жантөрин атындағы музыкалық драма театрында Маңғыстау облыстық «Қазақ тілі» қоғамының ұйымдастыруымен Алаш қозғалысының 100 жылдығына орай «Алаш идеясы және Тәуелсіздік» атты жас ақындар мүшәйрасының марапаттау салтанаты өткізілді. Алаш идеясын, Алаш қайраткерлерінің арман-мұраты мен ерен еңбектерін жырлауды, Тәуелсіз Қазақстанның қалыптасуы мен дамуын, Елбасы саясатының маңызын, еліміздің рухани жаңғыру бағытын насихаттауды көздеген мүшәйраға 13 пен 20 жас аралығындағы 16 талапкер ақын қатысқан.
Алғашқы сөзді осы шараны ұйымдастырушы, облыстық «Қазақ тілі» қоғамының төрағасы, Қазақстан Республикасының мәдениет қайраткері және Құрметті журналисі, Маңғыстау облысының құрметті азаматы, Қазақстан Жазушылар одағының мүшесі Бектұр Төлеуғалиев алды.
-Биыл Алаш қозғалысына 100 жыл толып отыр. Алаштың ардагерлерін еске түсірумен қатар, өлеңдері бұрын еш жерде жарияланбаған жас талаптарды іріктеу мақсатында 13-20 жас аралығындағы ақындардың мүшәйрасын өткізуді жоспарлағанбыз. Сол 16 талапкердің ішінен қазылар алқасының мүшелері 5 баланы іріктеп алыпты. Қазір сол жас ақындарды марапаттауға жиналып отырмыз,-деді.
Жиналған өнерсүйер қауымға Қазақстан Республикасына еңбек сіңірген әртіс, дәулескер күйші Роза Айдарбаева Мұрат Өскінбаевтың «Бұлбұл Ақжелең» күйін, жыршы-термеші Жеткізген Сейітов Қалнияз жыраудың «Сөз бастау» жырын орындап, салтанатты шараның шырайын ашты.
Бұдан соң марапаттау рәсімі басталып, айтыскер ақын Фархад Мусаев пен ақын Темір Мыңжас 3 орынға ие болған Маңғыстау ауданы Шетпе гимназиясының 10 сынып оқушысы Айзада Ғабитқызын және 2 орынға ие болған Жаңаөзен қаласы, № 18 мектептің 10 сынып оқушысы Райхан Үсенбаеваны марапаттады.
1 орын иегері атанған Ақтау қаласы, № 27 мектебінің 10 сынып оқушысы Әйгерім Сәрсенбаеваны әдебиетші ғалым, Ш.Есенов атындағы Каспий Мемлекеттік технология және инжиниринг университетінің профессоры, қазылар алқасының төрағасы Әділет Қабылов марапаттады.
Жүлделі үш орыннан бөлек 2 талапкер - бейнеулік Қолғанат Алтыбай мен мұнайлылық Ибрахим Дәулетбаев ынталандыру сыйлығын олжалады.
Марапаттау соңынан жиналғандар алдында Маңғыстау «Өнер» колледжінің ұстазы, І республикалық «Жеті қайқы әндерін орындаушылар конкурсының» жеңімпазы Сәбит Шектібаевтың орындауындағы Тұрсын Алдашұлының «Оймауыт» әнін, осы оқу орнының мұғалімі, ҚР мәдениет саласының үздігі Ақмарал Ерімбетова халық әні «Ақеркені» шырқап берді.
Үміт ЖӘЛЕКЕ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
