Ақтауда «Ралли Казақстан - 2017» әлемдік додасы басталды (ФОТО)

©

20-26 мамыр аралығында Маңғыстау өңірінде «Ралли Казақстан - 2017» Ралли рейд Әлем Кубогының V этабы өтеді. Әлемдік дода ҚР Мәдениет және Спорт министрлігі, Маңғыстау облысының әкімдігі және ҚР Автомотоспорт Федерациясының қолдауымен өткізіліп отыр. Жарыс «Экспо-2017» Халықаралық көрмесімен орайластырылған. Көрмеге әлемнің түкпір-түкпірінен 5 миллионнан астам қонақ келеді деп күтілуде. «Ралли Казақстан - 2017» кезеңіне әлемнің 15 елінен (Казақстан, Сауд Арабиясы, БАӘ, Катар, Ресей, Украина, Польша, Литва, Германия, Чехия, Белоруссия, Нидерланды, Словения, Франция) 25 экипаж (50 спортшы) қатысады. -ҚР Автомотоспорт Федерациясы Ралли Рейдтен Әлем Кубогы этабын алғаш рет өткізіп отыр. Бұл – жыл сайын әр мемлекетте өткізіліп отыратын көпкезеңді жарыс. Осы жылы айтулы шараны біздің елімізде өткізу мүмкіндігі туды. Дүниежізілік доданың тарихына ену – ұйымдастырушылар үшін ғана емес, еліміз үшін де үлкен мәртебе, - деп атап өтті ҚР Автомотоспорт Федерациясының президенті Марат Әбіқаев. -Әлем Кубогы этабы бірнеше елдің басын біріктіреді. Олардың мәдениетін, спортын, танымы мен рухани мұрасын бір-бірімен ұштастырады. Алда қиындыққа толы, табандылық пен күш-жігерді қажет ететін мыңдаған шақырым жатыр.   Сіздер спортшы ретінде нағыз кәсібиліктеріңізді, мықтылықтарыңызды дәлелдеп, көрермендерге ұмытылмас әсер сыйлай білесіздер. Алдағы уақытта жарыстың қатысушылар саны артып, дәстүрлі түрде өткізілеріне сенімдіміз. Барлығыңызға сәттілік, күш-жігер тілеймін, - деп, Маңғыстау облысының әкімі Ералы Тоғжанов қатысушыларға ақ жол тіледі. «Ралли Қазақстан – 2017» алты этаптан тұрады. Барлығы 2494 шақырымды құрайды, оның ішінде 1846 шақырымы жедел жүру аймақтары. Экипаждар мына бағыттар бойынша жүреді: Т1 – сапасы жақсартылған сериялы автомобильдер, Т2 – сериялық үлгіден өзге жеңіл автомобильдер, Т3 – жеңілдетілген автомобильдер және Ұлттық класс. Сондай-ақ, «Ралли Қазақстан – 2017» додасында төмендегідей әлемге танымал спортшылар бақ сынайды: 1.Катар елінен келген  Nasser Al -Attiya (Катар шейхы, «Дакар» ралли-марафонның екі дүркін және Шығыстағы Ралли Чемпионатының 12 дүркін жеңімпазы). 2.Сауд Арабиясынан Yazeed Al-Rajhi (Кувейт, Сауд Арабиясы, Сирия, Швеция және Испаниядағы этаптардың жеңімпазы). 3.Польшалық Aron Domzala (Baja Russia жарысының жеңімпазы); 4.Miroslav Zapletal, чехиялық спортшы (FIA Bajas және Венгрия, Уельстегі Bajas жарыстарының жеңімпазы); 5.Mohammed Abu Issa, тағы бір катарлық қатысушы (Катардағы Sealine Rally секциясының жеңімпазы, Аль-Аттией және шейх Халид Аль-Кассими жүлдесі үшін өткен FIA чемпионатында үшінші сатыға тұрақтаған). Дүниежүзілік дода Қазастанның, әсіресе, Маңғыстау өңірінің сұлу табиғатын, тарихи жерлері мен мәдениетін өзге елдерге танытуға керемет мүмкіндік сыйлайды. Әлем «Аспан астындағы мұражай» аталып кеткен мекеннің тылсым табиғатына тағы бір тамсанатын болады. Маңғыстау – археологиялық қорықтары, 11 мың мемлекеттік қорғауға алынған тарихи ескерткіштері бар ежелгі өркениеттің мекені. Бекет Ата, Шақпақ Ата, Масат Ата секілді киелі орындарымен де ерекше. Ралли-Рейд «Ұлы Жібек Жолы» керуені жүрген Қарақия ойпаты арқылы өтеді. Қарақия алқабы кедергіге толы жарыс жолы үшін өте қолайлы. Ойпат әлем бойынша тереңдігі жөнінен (теңіз деңгейінен 132м төменде) төртінші орын алады. Оның алдын Гхор Турфан шұңқыры және Афар мен Каттар орайды. Бүгін Каспий жағалауында жарыстың түндігі түріліп, қатысушы барлық экипаж көпшілікке таныстырылды. Олардың қатарында отандық, оның ішінде ақтаулық шабандоздар да бой көрсетті. Ертеңнен бастап автошабандоздар жарыс жолына аттанады.

Теңге БЕКМҰРЗАЕВА

Суреттерді түсірген автор