Ақтауда ардагерлерге тегін стоматолиялық көмек көрсетілді

©

Қаламыздағы «Pro Smile» стоматологиялық клиникасы ардагерлерге арнап қайырымдылық акциясын өткізді. Сәуір айында бастау алған акция Жеңістің 72 жылдығы қарсаңына бірнеше қарияға көмек көрсетті. Клиника қарттарды жан-жақты тексеріп, тістерін толыққанды қалпына келтіріп берді. Шара аясында 1 051 000 теңге қаржы жұмсалған. Ардагерлердің әрқайсысына 3Д форматтағы диагностика жасалып, алдын-ала емдеу жоспары дайындалған. Бүгін клиника сол ардагерлерді тағы бір тексерістен өткізіп, акцияны қорытындылап, оларға сый-сияпат табыстады. Өкінішке қарай, денсаулығына байланысты ем қабылдағандардың кейбірі емханаға келе алмады. Тек тоқсанның төріне шыққан ардагер Асан Аймағанбетов қана келіп, «Аман болыңдар. Өтіп кеткен уақыттар, қиындықтар қайталанбасын. Алла сендерге бейнетсіз өмір берсін. Еліміздің бейбітшілігін берік ұстап отырған Елбасы аман болсын. Талаптарыңа нұр жауып, кәсіптерің өрлей берсін» деп, ақ батасын да берді. Асан ата Гурьев облысы, Маңғыстау ауданы, Сенек селосында 1925 жылы дүниеге келген. 1942 жылы күзде әскер қатарына алынған. 6 ай оқу-жетілдіру сабақтарынан өткен соң, Бұқараға барып, сол жерден Киевке соғысқа жөнелтілген. Одан әрі Минск, Белорусь, Кишинев, Молдова жерлеріндегі ұрыстарға қатысып, Германияға дейін жеткен. Соғыс кезінде басынан және кеудесінен үлкен жарақат алған. Қиындыққа берілмеген қайсар жауынгер 1945 жылдың 2 мамыры күні Германияға кіріп, сол жерде 9 мамырда Жеңісті сәтке куә болған. Келіні Зоя Аймағанбетованың айтуынша, соғыс аяқталған соң оларды Украина қалаларын қалыпқа келтіру мақсатында 3 жыл әскерге алып қалыпты. Сөйтіп, 1948 жылы ауылға аман-есен оралған. Қазір қария 8 баласынан 25 немере, 37 шөбере сүйіп отыр.  «Pro Smile» тіс емханасына көп рақмет. Атаның өзі де қуанышты, алғысын айтып отыр. Сыйлап, осылай құрмет көрсетіп жатқан барша мекемелерге, ұжымдарға алғысымыз шексіз. Бұрын басқа емханаға емдеткенбіз, ол кезде алмалы-салмалы протез қойып берген. Ал бұл клиника қозғалмайтын, тұрақты тіс орнатып берді, - деп атаның қызындай болып кеткен келіні Зоя Аймағанбетова қуанышымен бөлісті. Айта кетейік, бұл «Pro Smile» клиникасы ресми түрде 2016 жылдың 6 тамызында ашылған. Бұған дейін Мұнайлы ауданындағы клиника 2012 жылдан бері тұрғындарға қызмет көрсетіп келеді. Демалыссыз, үзіліссіз жұмыс істейтін тіс емханасы клиенттерге барлық ыңғайлы жағдайды жасап жүр. Кейде емделушілердің жағдайына қарай түнгі 10-ға дейін жұмыс істейді екен. Клиника Германиядан әкелінген үздік технологиямен жабдықталған. Құрылғылар арқаға жайлы, ұзақ уақыттық емделу кезінде ыңғайсыздық туғызбайды. Қызметкерлер жарты жыл сайын шет мемлекеттерде біліктілікті арттыру курстарынан өтеді. Атап айтсақ, Ресей, Қытай, Оңтүстік Корея, Араб Әмірліктері, Еуропа елдері. Мәселен, дәл қазір «KARDENT» ЖШС директоры, клиниканың бас дәрігері Қарасаев Жәнібек Мыңбайұлы Грузияда дәл сол курсқа қатысып жатыр. -Жалпы қайырымдылық шарасына 2 миллион теңге қаржы бөлінді. Сол қаржыға біз 10 ардагерге көмек көрсетеміз деп есептедік. Ол кісілерді тауып, туыстарымен хабарластық. Өкінішке қарай, барлығының бірдей келіп, клиникада ем қабылдауға мүмкіндіктері болмады. Бірі – алыс ауыл, ауданда болса, бірінің денсаулығы жарамайды дегендей. Сондықтан біз тек 4 ардагерге емдік шараларды жүргіздік. Бірақ біз мұнымен тоқтап қалмаймыз. Жыл соңына дейін тағы да ниетті кісілер болып жатса, көмекке әзірміз, - дейді клиниканың басқарушы директоры Антонина Огай. Клиника мұндай қайырымдылық шараны алғаш рет өткізіп отырған жоқ. Бұдан бұрын олар Маңғыстау облыстық балалар үйінің 17 тәрбиеленушісіне тегін көмек көрсеткен болатын. Бұл игі іс алдағы уақытта да жалғасын таппақ.

Теңге БЕКМҰРЗАЕВА

Суреттерді түсірген автор