Ералы Тоғжанов Бейнеудегі білімге баға берді (ФОТО)

6 сәуір күні Маңғыстау облысының әкімі Ералы Тоғжанов Бейнеу ауданына жұмыс сапары барысында Бейнеу селосындағы 320 орындық «Күйкен» орта мектебімен және 80 орындық  «Болашақ» балабақшасымен танысты.

Бүгінгі таңда Бейнеу ауданында 2441 бала тәрбиеленетін 23 мектеп жасына дейінгі балалар мекемесі қызмет етеді. Балаларды 3 жастан 6 жасқа дейінгі мектепке дейінгі оқу және тәрбиелеумен қамту 91,1 пайызды құрайды. Бейнеу және Боранқұл селоларында  әрбіреуі 150 орындық балабақша салуға жобалық-сметалық құжаттама дайындалуда. Бұл жобаларды мемлекеттік-жеке әріптестік механизмі арқылы іске асыру көзделіп отыр.

  Сондай-ақ, аймақ басшысы Бейнеу гимназиясының жұмысымен танысты.18 жыл білім беру қызметінде гимназия педагогтары 13  «Алтын белгі» иегерлерін дайындап шықты. Мектеп ғимаратында кабинеттер жаңа модификация бойынша жабдықталған, технология сыныптары, шеберхана, кітапхана, мультимедиялық кабинет, спорт және акт залдары, 24 орынға асхана бар.

-Оқушылардың білім сапасы жоғары деңгейде. Екі кезекте  барлығы 330 оқушы оқиды. Мектепке түсерде оқушылар емтихан тапсырады. Өткен жылы біздің түлегіміз «Алтын белгі» иегері атанды, ал екіншісі –ерекше үлгідегі аттестатқа ие болды. Қазір біз 8 сыныпқа биология пәнін қазақ, орыс және ағылшын тілдерінде оқытуды - экперименталды бағдарламаны дайындауға және енгізуге кірісіп жатырмыз,- деді Бейнеу гимназиясының директоры Болат Досанов.

 Аудан бойынша 2 мектепте үштілдікке көшу бойынша пилоттық жоба жүзеге асырылып жатыр. Өткен жылы 102 педагог 12 жылдық білім беру жүйесін енгізу аясында білім берудің мазмұнын жаңарту курстарынан өтті. Осы жылға 305 педагогты оқыту жоспарланып отыр. Ауданның барлық 26 мектебі кең жолақты интернетпен қамтамасыз етілген.

-Бейнеу ауданының мектептері басқа аудандар үшін сапалы білім беру процесін дұрыс ұйымдастырылғанымен үлгі болуы тиіс. Үш тілді білім беру жүйесін енгізу жұмыстарын жалғастыру қажет. Сондай-ақ, физика, химия кабинеттерінің лабораториясы үшін жаңа құрал-жабдықтарсатып алуды тапсырамын, мектептердегі практикалық сабақтарды өткізуге жұмсалатын шығындар сметасын ұсынуды тапсырамын, - деді аймақ басшысы Ералы Тоғжанов.

         Ауданның білім беру саласындағы өзекті мәселелердің бірі –Бейнеу политехникалық колледжінің типтік ғимаратының жоқтығы болып табылады. Колледж ғимараты 240 оқушыға арналған, бүгінде бұл жерде 586 адам оқып жатыр.

-Бізде 15 жұмысшы мамандығына және 11 орта буынды оқытуға лицензия бар. Біз темір жол көлігі,  авто көлікті пайдалану және қызмет көрсету, мұнай-газ саласы бойынша мамандар дайындаймыз. Қазіргі уақытта 586 студент 10 мамандық бойынша оқып жатыр. 482 адам мемлекеттік тапсырыс бойынша, сыртқы бөлімде 80 адам, ақылы топта 24 студент оқиды, - деді Бейнеу политехникалық колледжінің директоры Нұрбол Бурин.

Облыстық білім беру басқармасына политехникалық және гуманитарлық-экономикалық колледждерінің типтік ғимаратының жатақанасымен бірге жобалық-сметалық құжаттамасын дайындауды тапсырамын. Бұл бірнеше мәселелерді шешеді. Біріншіден, басқа селолардан келіп оқитын балаларға жатақанада тұруға мүмкіндік береді. Сондай-ақ, босаған колледж ғимаратына үш ауысымды оқытуды болдырмау қаупін жою мақсатында орта мектептерді көшіруге мүмкіндік береді,- деп атап өтті Маңғыстау облысының әкімі Ералы Тоғжанов.

Осы күні аймақ басшысы аудандық орталық аурухана, жастар орталығы, нашар көретін және көзі көрмейтін тұрғындар үшін бөлек оқу залы бар электронды кітапхана жүйесіне көшкен кітапхана, музыкалық мектеп, Мұғалімдер үйі, Бейнеудің басты көрікті жері – жастар саябағына барды.

-Бейнеу селосында қазақстандықтардың бірлігі мен қонақжайлылықтың символы аққулар мен тайқазан секілді сәулет формалары орнатылған. Облыс әкімінің орынбасары Бану Нұрғазиеваға Ақтау қаласында осы сияқты ескерткіштерді орнатуға жобалар дайындауды тапсырамын, -деді Ералы Тоғжанов. 

Маңғыстау облысы әкімінің баспасөз қызметі Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.