Өткен жылы 500-ден астам еңбекші-мигранттар тексерілуден өтіп, олардың 44-нен құрт ауруы анықталған. Ал, 2017 жыл басталғалы бір айдың ішінде 4 мигрант туберкулезбен тіркелген. Бұл жайында облыстық туберкулезге қарсы диспансерінде өткен пресс-конференцияда айтылды.
- Туберкулезбен анықталған 44 мигрант дағыстандық, қарақалпақстандық, өзбекстандық, әзірбайжандық, украиналық, үндістандық азаматтар болып шықты. Басым көпшілігі құрылыс саласында еңбек ететін азаматтар, - дейді облыстық туберкулезге қарсы диспансерінің бас дәрігері Қуат Титанов.
Жалпы жыл басынан бері Маңғыстауда құрт ауыруымен ауыратын жаңадан 32 адам есепке алынған. Оның 34-і ересектер. Ал, 2016 жылдың осы кезеңіндегі көрсеткіш-38 болатын.
- Облыста науқас саны төмендегенімен сырқаттанушылық деңгейі өсті. 2016 жылдың қаңтарында Ақтау қаласы бойынша алты науқас анықталса, биыл 11 тұрғын құрт ауыруымен тіркелді. Облыста туберкулезбен ауыратын 18 жасқа дейінгі 4 бала есепте тұр. Науқастардың басым көпшілігі-Ақтау, Жаңаөзен қалалары мен Мұнайлы ауданынан есепке алынған. Жалпы аймақта құрт ауыруы 19,4 пайызға төмендеді. Туберкулездің алдын алудың аса тиімді тәсілдерінің бірі халықты профилактикалық медициналық тексеру болып табылады. Сондықтан да облыстық салауатты өмір салтын қалыптастыру проблемалары орталығының жоспарына сәйкес өңірде «Дүниежүзілік туберкулезге қарсы күрес күні және соған орайластырылған туберкулездің алдын алу» айлығы басталды. 24 ақпан мен 24 наурыз аралығында өткізілетін айлық аясында тұрғындарды тексеріп, аурудың алдын алу тұрғысынан кеңес беретін боламыз. Өйткені, туберкулездің алдын алудың аса тиімді тәсілдерінің бірі халықты профилактикалық медициналық тексеру болып табылады. Туберкулезді рентгенологиялық әдіспен көкірек қуысын флюрография және рентгенологиялық әдіспен зерттеу арқылы анықтауға болады, - дейді облыстық туберкулезге қарсы диспансерінің бас дәрігері Қуат Титанов.
Елбасының қолдауының және туберкулезге қарсы кешенді шараларды сапалы іске асырудың арқасында соңғы 10 жылда Қазақстанда туберкулезбен аурушаңдылық көрсеткіші 2,2 есеге және өлім-жітім 5 есеге төмендеген. 2016 жылдың қорытындысы бойынша республикада туберкулез бойынша тұрақты індетті жағдай байқалуда. Мұны ел бойынша туберкулезбен аурушаңдылық көрсеткішінің 2015 жылы 100 мың халыққа шаққанда 58,5-ке қарағанда 9,9%-ға төмендеп 52,7-ні құрағаны дәлелдеп отыр. Аурушаңдылық көрсеткішінің төмендеуі барлық облыстарда байқалады. 2016 жылдың қорытыныдысы бойынша өлім-жітім көрсеткіші 2015 жылғы 100 мың халыққа шаққанда 4,1-ге қарағанда 3,4-ті құрап, 17,1%-ға төмендеген.
Венера МИРЛАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
