Жастарға ұнаған жас режиссер фильмі

Ақтау жастары «Юность» кинозалында жерлестері Хайрулла Сұлтанның дебюттік фильмін тамашалады.

Кино әлемінде өз туындысымен өз қатарлары арасында батыл қолтаңба танытып үлгерген маңғыстаулық Хайрулла Сұлтан Ақтау қаласында дүниеге келіп, № 10 мектепте білім алған өнерлі жас.

Ол қазір Америка Құрама Штаттарының Лос-Анджелес қаласындағы Голливуд киноқалашығында 1992 жылы құрылған Нью-Йорк киноакадемиясының режиссерлік курсында оқып жүр.

Хайрулла дүние жүзінің талантты жастары бас қосқан Нью-Йорк кино академиясының 3 курс студенті. Ол білім алатын Universal Studios - оқу орны белгілі продюсерлер, кинорежиссерлер, актерлер даярлайтын өнершеберханасы саналады. Оқу класында 15-16 студент актерлік шеберліктің қыр-сырын үйренумен қатар, режиссерлік өнердің де түрлі деңгейлерін ағылшын тілінде меңгеріп шығады. Сондықтан ол жерде оқу үшін ең алдымен ағылшын тілін өз дәрежесінде білу керек.

Жылына 6000 студент даярлап шығаратын үлкен мектептің әр салада тәжірибе алмасу бағдарламасы өте бай. Ол жерде режиссер, документальді фильмдер режиссері, кино және телевидения актері, сценарий  даярлаушы, продюсер, журналист, 3D анимация маманы, фотография маманы, кинематографшы, компьютер ойындарының дизайнері, музыкалы театр актері секілді мамандарды оқытады.

Оқу орны шеңберінде Нью Йорктан басқа да, Лос Анджелестегі Universal Studios,  Флоридадағы Дисней студиясының және Харвард, Оксфорд, Кембридж, Йель, Принстон, Калифорния, Кореядағы KAIST университеті және Португалияның Порто қаласындағы католиктік секілді беделді университеттердің дәрістерін алу мүмкіндігі бар.

Жерлесіміз Хайрулла Сұлтан семестрлік жұмыс ретінде драмалық-соғыс өнері жанрындағы қарапайым күнделікті өмір оқиғасына құрылған қысқа метражды фильмнің басты рольдерін америкалық өнерлі жастар Хосе Розете мен Ренди сомдапты. Фильм Америкада түсірілген. Туындының сценариін украиндық әуесқой режиссер Александр Мельник жазған.

Жас талапкердің тырнақалды туындысы Америка секілді киноөнері қарыштап дамыған алпауыт елде жүйелі өтіп тұратын беделді 2 фестивальдің жүлдесін олжалап үлгерген.

Болашағынан үлкен үміт күттірген қазақ жастары Голливуд кино әлемінің жұлдыздарына айналар күн де алыс емес секілді. Жас талапқа сәттілік тілейміз!

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.