Ақтау қаласының 15 шағын ауданының тұрғындары апатты жағдайда тұрған лифтімен мініп-түсудің өзі қорқынышты екенін айтады, - деп хабарлайды mangystaumedia.kz.
9 қабатта тұратын Марал Бектегенова ескі лифтімен күніне бірнеше мәрте мініп-түскен сайын техника тоқтап қала ма деп қорқатынын айтады. Өйткені онда қалып қойып, есік ашылмай қалатын жағдай жиі кездеседі екен.
Мына жеделсатының әбден тозығы жеткен. Бірнеше рет ішінде қамалып қалдық. Балам мінгенде талай рет есігі ашылмай, маман шақырттық. Олар да 40 минуттан соң келеді. Кеңес дәуірінен бері тұрған лифтілерді ауыстыру керек, - дейді Марал Бектегенова.
Ал мамандар тұрғындардың да кінәсі бар дейді.
4 шағын ауданда жаңадан орнатылған лифтіні өртеп жіберді. Бұйрық беретін батырмаларды адам көзін шұқығандай етіп ойып алған. 12 шағын аудандағы бір үйдің лифтісіндегі бөлшектерін толық жұлып алған. Содан кейін неге жөндемейсіңдер дейді. Оны жөндеуге ақша керек. Ол да аз ақша емес, - дейді «Ақтау қалалық лифтілер» ЖШС директорының кеңесшісі Көпберген Жайлиев.
Қазақстанда жеделсаты құрастырылмайтынын ескерсек, Украинадан тасымалданатын техниканың әрқайсысы 8 миллион теңгеден асады.
Айта кетейік, Ақтау қаласы бойынша көпқабатты үйлерге 306 лифт орнатылған. Ал 162 лифт ауыстыруды талап етеді. Яғни қазірдің өзінде 128 лифт мүлдем жұмыс істемейді, ал 34 лифт апатты жағдайда тұр.
МАХАББАТ НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
