Ақтау қаласындағы газ құю бекеттерінің қожайындары түйіткілді мәселелерімен Маңғыстау облысы кәсіпкерлер палатасына жүгінді, - деп хабарлайды mangystaumedia.kz.
Басқосу энергетика министрлігімен онлайн байланыс арқылы өтті. Сұйытылған газ стансаларының иелері бөлінетін газ көлемін ұлғайтуды, бағаны тұрақтандыруды және көгілдір отынды электронды сауда алаңында сату механизмін өзгертуді алға тартып отыр. Өйткені электронды сауда алаңында кейбір кәсіпкер сұйытылған газды шамадан тыс көлемде алса, енді біріне жетпейтін көрінеді.
ЭСА өткізу ерекшелігін өзгерту керек. Шектік мөлшерін белгілеу тиіс. Әр кәсіпкерге 70-80 тонна бөлінсе дейміз. Сосын жариялылықты енгізу қажет. Кім, қанша алды дегендей. Маңғыстауға ма, әдже басқа жаққа кетті ме? Соны айтып отырмыз. Газ зауыты ай сайын 14 мың 600 тонна өнім шығарады, соны 20 мың тоннаға жеткізу керек. Оны да қарастырамыз деді, - дейді кәсіпкер Тағанияз Боқанов.
Кәсіпкерлер газ өңдеу зауытына Қарақұдық, Доңға кен орындарының леспе газдарын да пайдалануды ұсынды. Төтенше жағдай кезінде литрі 50 тг деп белгіленген бағаны өсіру жағдайы сөз болды.
Нормативтік құжаттарға өзгеріс енгізу керек. Кейбірінің күшін жою керек. Осыған байланысты осы жерге келген тараптар өз ұсыныстарын Атамекенге береді. Біз соған байланысты хат дайындаймыз. Жобалық кеңсеге, Үкіметке жібереміз. Шешу жолдарын көрсетіп жібереміз, - дейді Еділ Жаңбыршин Маңғыстау облысы кәсіпкерлер палатасы Өңірлік кеңесінің төрағасы.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
