Нарықтық жүйенің жүгі ауыр болса да...

Бірнеше айдан бері әлемде мұнай бағасының құлдырауы жаһандық эко­номиканың өсімін баяулатып, дағдарыс алпауыт елдердің өзін қыс­паққа алуда. Табысын «қара алтыннан» еселеп отырған мұнай өндіруші мем­лекеттермен қатар біздің елімізде де экономиканың салмағы өндіріске ар­тылғаны белгілі. Жаһандағы қаржылық-экономикалық өзгерістерге байланысты мұнай компаниялары отандық экономиканың даму қарқынын бәсеңдетіп алмауға әрекет етіп, қысылтаяң шақтан шығуға қам-қарекет жасауда.  Қарақұрым халықты алаңдатқан қиындықты еңсеру бағытында атқарылып жатқан жұмыстарды білмек­ке «Маңғыстаумұнайгаз» акционерлік қоғамы бас директорының бірінші орынба­сары Бақыт Иманбаевпен сұхбаттасқан едік. 

– Бақыт Алтайұлы, алдымен ак­ционерлік қоғамның өткен жы­лы атқарған жұмы­сы мен жа­ңалықтарын көпші­­­лікпен бө­ліс­сеңіз. «Қара алтын» өнді­рудің қарқыны қа­лай? Жыл­дық  өнім өндіру көрсеткі­ші межелі мөл­шерге жетті ме? 

– Әлемдік нарықта мұнай ба­ға­сы­ның төмендеуіне байланысты орын алған дағдарысқа қа­рамастан өткен жыл біздің ком­­па­ния үшін жемісті болды. «Маң­ғыстаумұнайгаз» акционерлік қо­ғамы 50 жылғы белесінде келеше­гі кемел, өндірісі өрге домалаған қуат­­ты компанияға айналды. Өткен жылы 50 жылдық мерейтойымызды тойлап, өлкеде компанияға тұң­ғыш ашқан ардагер мұнайшылар­­ды сый-құрметке бөлеп, өндіріс озаттарын мара­пат­­тадық. Өндірістік көр­сет­кіш­терге келсек, өткен жыл­ға 6 млн. 151 мың тонна мұнай өн­діруді жоспарлаған едік. Жылдық көр­сеткіштің нәтижесі бойынша жос­пар артығымен орындалып, жер қойнауынан 6 млн. 273 мың тонна «қара алтын» өндірілді. Бұл ретте еңбек өнімділігін арттырып, ел ырысын еселей түскен мұнайшылардың еңбегі құрметке лайық деп ойлаймын. Компания ұжымының ауызбіршілігі мен еңбекқорлығының арқасында алған асуларымыз бен бағындырған белестеріміз де аз емес. Жерасты байлығын игеруде жаңа технологияларды өндіріске енгізу арқылы өнім сапасын арттыруды қолға алдық. Өткен жылдың қыркүйек айында «Қаламқас» кен орнында ор­наласқан №2041, 2049 айдау ұңғымаларының учаскелерінде жер қыртыстарына полимер айдау жұмыстары басталып кетті. 2014 жылдың қорытындысы бойынша қосымша өнім көлемі 1 341,2 тоннаны құрады. Алдын ала есептеуіміз бойынша полимермен суландыру технологиясын қолдану арқылы 2023 жылға қарай «Қаламқас» кен орнының жылдық өндіріс көлемін 6,547 млн. тоннаға жеткізуге болады. Ал қолданыстағы су айдау технологиясын жалғастыра беретін болсақ, жылдық өнімді өндіру 3,620 млн. тоннаға дейін төмендеуі ықтимал.  Полимерлік суландыру әдісінің тәжірибелік сынағы жақсы нәтиже беретін болса, облысымызда полимер өндіру зауыты салынуы мүмкін.

Өткен жылдың қазан айында «Қаламқас» кен орнында қуат­ты­лығы 2х45 мегаватты құрайтын газтурбиналық электр станц­иясы­ның іске қосы­луы жаңа жұмыс орындарын ашуға, энер­гия қуатын өнді­руші және оны тасымалдаушы мекемелерден электр қуа­тын сатып алуға жұмсалатын қаражатты қыс­қар­туға, электр тораптарына тү­сетін салмақты азайтуға сеп болды. «МАЭК-Қазатомөнеркә­сіп» ЖШС-нің электр станцияларында қосымша электр қуаты босап, оларды жаңа өнер­кәсіп нысандарына тасымалдау мүмкіндігі ту­ды. Демек, газтур­биналық электр станция­сының қол­данысқа берілуі тек ком­панияның дамуына серпін бе­ріп қоймай, жалпы облыс эко­но­микасының дамуына да оң әсерін тигізіп отыр.

– Әлем мемлекеттерін алаң­­датып отырған мұнай ба­ға­­сы­ның құлдырауы еліміздің мұ­най-газ секторында жетекші орын­ға ие «Маңғыстау­мұнайгаз» акц­ионерлік қоға­мы­на қалай әсер ету­де? 

– «Қара алтын» бағасының күрт төмендеуі салдарынан елі­міз­дегі мұнай өндіруші компания­лармен қатар біздің акционерлік қоғамда да туындаған қаржылық қиындықтарға тө­теп беруге ты­ры­сып-бағудамыз.  Бюд­жетімізді қай­та қарап, қатаң үнемдеу шарала­рын қол­ға алдық. Бұл жағдай қыз­меткерлердің жала­қысына не­ме­се бұған дейін бері­летін әлеуметтік жеңілдіктерге еш әсе­рін тигізбейді. Бірақ, кейбір бағдарламалардан бас тартуға тура келді, негізгі бағыттар, төлемдер сол қалпында қалды. Ауған соғысының ардагарлеріне және жаңадан шаңы­рақ көтерген қызметкерлерге тө­ле­нетін жәрдемақы, Чернобыль апа­тының зардабын жою­ға қа­тысқан қызметкерлерге бері­летін көмек тоқтатылды. Төрт және одан да көп кәмелетке толмаған бала тәрбиелеп отыр­ған қызметкерлерге төлене­тін жәрдемақы көлемі 100 ай­лық есептік көрсеткіштен 50-ге азайтылды. Ұжымдық шарт­қа сәйкес, 2014 жы­лы қыз­мет­кер­лерге көрсетілген жалпы материалдық көмек ретінде 694 млн. теңге бөлінсе (бұл қаржыға балалардың сауықтыру орындарындағы жазғы демалысы, бала туылғанда көрсетілетін көмек, мүгедектерге төленетін жәрдемақы т.б. кіреді),  шаңырақ көтеруге байланысты бөлінген жәр­демақының мөлшері 10 млн. теңгені құрады. Демек, біздің бас тартқан жеңілдіктеріміз жалпы әлеуметтік жәрдемақылардың шағын ғана бө­лігін құрайды. Бұл- амалсыздықтан жасалып отырған қадам екенін айтып өткім келеді. Мұнай бағасы тұрақтанса,  тоқтатылған жеңілдіктер қайта жалғасатын болады. Үнемдеу ар­қылы өндірістік және шаруа­шы­лық бағыттардың шы­ғын­дарын азайтуға жұмыста­нып жатырмыз. Мысалы, бөлім бас­шыларына кө­лік жалдауға ке­тетін және т.б. сол сияқты шы­ғындарды қысқартуды қайта қараудамыз. Сонымен қатар 2015 жылы Мұнайшылар күні, Жаңа жыл сияқты мерекелік шаралар өткізілмейді. Өзі­ңіз көріп отырғандай, мекеме қыз­меткерле­рі алдындағы әлеу­мет­тік міндетте­рімізді мейлінше толыққанды орын­­дап жатырмыз.

– Өткен жылы қаржылық қи­ындықты бастан кешірген ком­­пания тарапынан жұ­­мыс­­­­шы­­ларға бонус, яғни қо­сымша сый­­ақы берілді ме?

– 2013 жылы жұмыс беруші мен кәсіподақ ұйымының, сондай-ақ «Маңғыстаумұнайгаз» АҚ қызмет­кер­лерінің арасында үшжақты ұжымдық шарт жасалды. Осы ұжым­дық шарт тармақтарының бі­рінде жылдық өнім өндіру жоспары артығымен орындалған жағдайда бонус төлеу қарастырылған. Жоға­рыда айтқанымдай, компания 2014 жылы жоспардан тыс 122 мың тоннадан астам мұнай өндірді, яғни бонус төлеуге негіз бар. Алайда, оны төлеудің шарты бойынша мұнай бағасы барреліне 96 АҚШ долларынан кем болмауы керек. Өткен жылы құлдыраған мұнай бағамының желтоқсан айында 46-47 дол­ларға дейін төмендегенінен көпшілік хабардар. Бірақ на­рықта мұндай жағдайдың орын алуына, әлемдік геосаяси және экономикалық ахуал­дың қиын­дауына жыл бойы адал ең­бектенген мұнайшылардың кі­нә­сі жоқ. Осыны ескере отырып, жағ­дайдың қиындығына қа­рамастан басқарма бонустарды төлеуге шешім қа­былдады. Осы шешімнің жүзеге асуына қолдау көрсеткен акционерлеріміз «ҚазМұнайГаз» Барлау Өндіру» АҚ және «СNРС» компаниясына алғысымды біл­­­діремін. Тікелей өндіріс жұ­мыс­тарымен айналысатын «Қа­лам­қас» пен «Жетібай» кен орын­да­рының жұмысшылары үш бонустан және осындағы қо­сал­қы қызметкерлер (аспазшы­лар, медицина қызметкерлері, кір жуушылар, күзетшілер жә­не т.б.) 2,5 бонустан, ал Ақ­тау қаласындағы орталық аппа­рат­­тың қызметкерле­рі бір бонустан алды. Осылайша, бонус мәселесі де шешілді. Бір қуантарлығы, қыз­меткерлер бар­­­­­лық жағдайға тү­сі­ністікпен қа­­рады. 90-шы жылдарды еске тү­­­сірсек, жұмысшылар бонус тү­гі­лі айлап жалақыларын да ала ал­май жүрді емес пе?! Ол қиын­дықтарды да еңсердік.  Ерте ме, кеш пе әлем­дегі өтпелі кезең шегіне жетіп, эко­номикалық ахуал тұрақ­танары сөзсіз. Сол кезде біздің компания еңсесін тіктеп, қайта қалпына келеді деген се­німдемін.

– Бүгінгі таңда мұнайшы ма­мандығын игерген кадрлар көп, мәртебелі мамандық бойын­ша жұмысқа тұрсам дейтін жастардың қарасы қа­лың. Мұ­най мекемелеріне, өндірістік бас­қармаларға жұ­мысқа орналасу да  қиын. Осы мәселе жөнінде не айтасыз? 

- Тұрақты жұмысқа орналасу бүгінгі күннің өзекті мәселелерінің біріне айналды. Мұнай компанияларына жұмысқа тұрғысы келетін жастарды түсінуге болады. Жоғары жалақы алып, әлеуметтік жеңілдіктерге ие болғысы келеді. Алайда, мұнай мекемелері ниет білдіргендердің барлығын бірдей жұмыспен қамти алмайды. Қазір­гі таңда «Маңғыстаумұнайгаз» акционерлік қоғамында 6000-ға жу­ық қызметкер бар. Үстіміздегі жыл­дың 22 қаңтарынан бастап 1 мау­­сымға дейін жұмысқа алуды мүл­­дем тоқтатып қойдық. Бұдан бөлек бізде қызметте кезінде «Маң­­ғыстаумұнайгаз» АҚ арнайы бағ­­дар­ламасы бойынша Алматы қала­сындағы Каспий қо­ғамдық университетін бітірген тағылымдама­шыларымыз да бар. 2008 жылдан бері Каспий қоғамдық университетін бітіріп келген 369 жас маман жұмысқа орналасу жөнінде өтініш берді, солардың 121-і бүгінгі таңда әлі тағылымдамашы ретінде, яғни  штаттан тыс қызмет етіп жатыр. Оқу бітіріп келген жастар жұмыс сұрайды, бізде бос жұмыс орындары жоқ. Олардың көпшілігі қазір тағылымдамашы ретінде қызмет етеді, оларды да тұрақты жұмыспен қамтуымыз қажет. 2014 жылы әкімдіктің жолдауымен және аз қамтылған отбасылардан 30 азамат «Жеті­бай­мұнайгаз» өндірістік бас­­қар­масына жұмысқа қабыл­данды.

– Бақыт Алтайұлы, сіз жоғары­да үнемдеу шаралары қолға алын­ғаны жөнінде айтып өттіңіз. Мұ­най бағамы одан әрі құлдырай берген жағ­дайда атқаратын іс-шаралар жоспары құрылды ма? Қыз­меткерлер өз болашағына қан­­шалықты сенімді бола ала­ды, жұ­мысшылар қысқартуға ұшы­рап қалмай ма?    

– Облыс әкімі Алик Серікұлы  өңірдегі ірі мұнай және газ өндіре­тін компаниялардың басшыларына мұнай бағасының төмендеуіне байланысты еңбек ұжымдарында әлеуметтік тұрақ­тылықты сақтап, жұмыс орын­дарының  қысқаруына жол бер­мей, осы мәселеде тиісті шара­лар  алуды тапсырған болатын. Өздеріңізге белгілі, ақ­пан айының басында Ақтау қаласында ҚР Энергетика министрі Владимир Школьник, ҚР Инвестициялар және даму министрі Әсет Исекешев және Маңғыстау облысының әкімі Алик Айдарбаев қатысқан аймақтағы жұ­мыс жүйесін тұрақтандыру жә­не жұмысшылардың еңбек құ­қықта­ры мен кепілдіктерін қамтамасыз ету мәселелері жө­нінде форум өт­ті.  Облыс әкім­дігі, жұмыс беруші­лер мен об­лыстық кәсіподақ кеңе­сі­нің ара­сында «еңбек құқығын жә­не жұмысшыларға еңбек ке­піл­­­де­мелерін қамтамасыз етуге ба­­­­ғыт­­­талған өзара әріптестік тура­лы», «Өңірдегі ірі мекемелер мен отандық тауар өндірушілер ара­­­сында жергілікті үлесті арттыру бойынша әріптестік туралы» ме­мо­рандумға қол қойылды. Яғ­ни, «Маңғыстаумұнайгаз» АҚ-ның штат­тық санында қысқарту бол­май­тындығын ерекше атап өт­кім келеді.

– Кен орындарындағы еңбек ұжымдарымен жиі кездесіп тұ­расыз ба? Еңбек қатынасында, өндіріс басында туындаған қиын­дықтар мен өзге де мәселелер қа­лай реттеледі? 

– Өндірістік басқармалардағы жұмысшылармен кездесу тұрақ­ты түрде өткізіліп тұрады. Үсті­міздегі жылдың қаңтар айын­да «Маңғыстаумұнайгаз» АҚ бас ди­­­рек­торының орынбасарла­ры, департамент басшылары, кәсіп­одақ ұйымының өкілдері және «Қаламқас» пен «Жетібай» кен орындарының еңбек ұжымдары қатысқан жиын өтті. Осындай кездесулер басшылық пен қызметкер­лер арасындағы түсі­ніспеушілікті жойып, қандай да бір мәселелерді шешу үшін тікелей басшылықпен тілдесуге мүмкіндік беретіндіктен мұндай басқосулардың маңызы өте жоғары деп ойлай­мын. Кен орындарда мекеме бас­­шы­­ларының қатысуымен өтетін кез­десулерде әртүрлі мәселелер тал­­­қы­ланып, шешімін тауып жатады. Сондай-ақ, адам ресурстарын бас­қару департаменті мен әкімшілік сұ­­рақтар және әлеуметтік даму де­парта­мен­тінің өкілдерінен құ­ралған кен орындардағы әлеу­меттік нысан­дар мен жұмыс орындарының жағ­дайын бақылайтын арнайы топ құрылды. Жұмыс тобы тоқсан сайын «Қаламқас» және «Жетібай» кен орындарына барып, әлеуметтік-тұрмыстық жағдайларды, еңбек қатынастарын, жұмысшылардың қа­­­уіпсіздігін және т.б. тексеріп, ту­ын­даған мәселелерді шешуге жұ­мыстанады. Осылайша, компания басшылығы және мемлекеттік құ­ры­лымдар тара­пынан өн­дірістік жағдайды тұрақтандыру, мұнай­шылардың ішкі еңбек тәртібін сақ­­тау қа­жеттілігі жөніндегі ша­ра­лар­ды түсіндіруге және әлеу­меттік-еңбек шиеленістерінің алдын алуға бағыт­талған шараларды тұрақты жүзеге асырамыз.

– Елбасымыз Нұрсұлтан На­зарбаев­тың тапсырмасы­на сәй­кес, отандық тауар өнді­ру­шілерді қол­дау арқы­­лы эконо­ми­­­ка­ның өр­­кен­деуіне ықпал ету басты на­­зарға алы­нып отыр. Ак­­­цио­­нерлік қоғам елімізде отан­дық өнімнің бәсекеге қабі­лет­­ті­лігін арттыру­ға, кәсіп­кер­лер­ліктің кеңге қа­­нат жаюы­на қанша­­лықты септігін тигізіп отыр?  

–  «Маңғыстаумұнайгаз» АҚ жер қойнауын пайдалану тура­лы ке­лісімшарттарында қа­­рас­ты­рылған міндеттемеле­ріне сәйкес, жергілікті тауарларды  жыл­­дық сатып алу жоспары – 30%, жұмыстар – 60% және қыз­меттер – 80%-дан кем болмауы керек. Бұл мәселе бойынша біз­дің компания міндеттемелерді қатаң назарда ұстап, тіпті кей жағдайларда артығымен орындап келеді. Мәселен, 2014 жылы компания жалпы сомасы 260 млрд. теңгені құрайтын тауарлар, жұмыстар мен қызметтерді сатып алды. Оның ішінде қазақстандық тауарлар, жұ­мыстар мен қыз­меттердің үлесі   200 млрд. тең­геден асып түсті, демек, жалпы сатып алу сомасының 76 пайызын құрайды. Таяуда жергілікті ауылша­руа­шы­лығы өнімдерін өндіру­ші­лер­мен құны 547 миллион тең­гені құ­райтын меморандумға қол қой­дық. Сонымен қатар, жергілікті сүт өнімдерін өнді­ретін мекемелермен де осындай меморандумға отыру жос­п­арда бар. Жуырда жер­гі­лікті шаруа қожалықтарымен келісілген меморандумға сәй­кес, мұ­найшыларды етпен қам­тамасыз етіп отырмыз. Осы орайда компания отандық тауар өндірушілерді қол­дауға ба­ғыт­талған міндеттемелерді ар­тығымен орындайтындығын  та­ғы да атап өткім келеді.

– «Маңғыстаумұнайгаз» АҚ–ның жергілікті әлеуметтік инф­рақұрылымды дамытуға қо­сып жатқан үлесі қандай? 

– Біздің акционерлік қоғам алдына қойылған әлеуметтік жауапкершілікті әрдайым жете түсінеді. Компания мұнай мен газ өндіріп қана қоймай, өңірдің әлеуметтік инфрақұрылымының дамуына, халықтың тұрмыс жағ­дайының жақсаруына белсенді атсалысып келеді. Соңғы бес жылдың өзінде-ақ әлеуметтік-инф­рақұрылымдық жобаларды жү­зеге асыруға 2 млрд. 598 млн. теңге қаржы жұмсалды. Соның ішінде ауыл- аймақтарды дамыту үшін 713 млн. теңге бөлінді. Бұл қаржыға спорттық алаңдар салынып, жолдар жөнделді.  Электр желілері тартылып, бір­қатар мектептер компьютер сы­­ныптарымен жабдықталып, мә­дени-әлеуметтік нысандар, т.б. жөндеуден өтті.  Мә­селен, Же­тібай ауылында спорт­тық ке­шен мен музыка мектебі салынып, халық игілігіне тапсырылды. Шебір елді мекенінде де спорттық кешен бой көтерді. Ақтау-Қаламқас тасжолын жөн­деуге 523 млн. теңге, Ақтау қаласының №10 балабақшасын күрделі жөндеуден өткізуге 333 млн. теңге қаралды. Теңіз суын тұшытатын зауыт ком­му­налдық меншікке ақысыз түр­де тапсырылды. Бұл біз жаса­­ған жұмыстардың аз бөлігі ға­на, атқарылған шаруалар көп.

Биылғы жылы экономикалық жағдайдың қиындығына қара­мас­тан «Маңғыстаумұнай­газ» АҚ облыс шеңберінде әлеумет­тік инф­ра­құрылымды жетілді­руге 300млн. теңге бөлуді жоспарлап отыр.  2014 жылдың өзін­де «Маңғыс­тау­мұнайгаз» АҚ жергілікті бюджетке 304 млрд. теңге қаражат салды. Ал соң­ғы бес жылда мемлекеттік бюджетке 1 трлн. 346 млрд. 560 млн. теңге салық төленді.

– Өткен жылы акционерлік қоғам жанынан құрылған Жас мамандар кеңесінің қызметі туралы айтып өтсеңіз. 

– 2014 жылдың тамыз айында мекеме жанынан Жас мамандар кеңесі құрылды. Оның құрамында белсенді, жан-жақ­ты, компанияның қоғамдық өмі­ріне етене араласып жүрген жастар бар. Кеңес мекеменің жас мамандарын біріктіру, өндіріске тез сіңісуін қамтамасыз ету, жастардың шығармашылық қа­білеттерін тиім­ді пайдалану мақсатында құрылды. Кеңес өз қызметінде мекеме алдында тұрған өндірістік тапсырмаларды орындауға көмектеседі. Бұл кеңесті құру туралы шешімнің стратегиялық жоғары маңызы бар, компанияның дамуына тікелей әсер етеді. Осы жас­тар – біздің күш-қуатымыз, «Маңғыс­таумұнайгаз» АҚ-ның болашағы! Ком­панияда білікті, бәсекеге қабілетті ұжым қалыптастыру да, мекеме алдында туындайтын күрделі мәселелерді шешу де сол жастардың қолын­да!

Кеңес жақында құрылса да, жас мамандар мекеменің аясында ғана шектеліп қалмай, аймақтың қо­ғам­дық өміріне белсенді араласып келеді. Өлкеміздің тарихи-мәде­ни орындарына тазалық жұмыста­рын, әртүрлі қайырымдылық шараларын өткізумен қатар мұқтаж жандарға көмек қолын созып, мұ­найшы ардагерлермен кездесулер ұйымдастырып, тағы да басқа шараларды қолға алды. Осындай болашағынан зор үміт күттіретін ұрпақтың өсіп келе жатқанына қуанамын. Болашақта осы жастар майталман мұнайшылардың ізін жал­ғап, шынайы патриот боларына сеніммен қараймын.

– Қой жылы атқарылатын жұ­мыстар мен өн­дірістік жоспарлар туралы қыс­қаша  мағлұмат берсеңіз...

- Биыл «Маңғыстаумұнайгаз» АҚ 6 млн. 250 мың тонна, оның ішінде «Қаламқасмұнайгаз» өн­ді­­рістік басқармасынан 4 141 605млн. тонна, «Жетібаймұнайгаз­дан» 2 108 395 млн. тонна «қара ал­­тын» өндіру жос­­парланып отыр. Жа­ңа техника мен технология­лар­ды өндіріске ен­гізу туралы айт­сақ, 2015 жылы ұңғымалардың жөндеуаралық мерзімін ұлғайту және өндірі­летін мұнай көлемін арттыру мақсатында «Қаламқас» кен орнында бұрандалы сораптарды штангалы түріне алмастыру жұмыстарын жалғасты­ра бер­мекпіз. «ННАБ-95» маркалы штан­­галы сорабы жоғары дебитті 16 ұңғымаға қондырылғаннан кейін 9 845,3 тонна көлемінде қосым­ша мұнай өндірілді. «Қа­лам­қас» кен орнында тәжіри­бе­лік-өндірістік сынақ жұмыс­тарын жүргізу барысында өткен жылы маусым айында №2235 ұңғымаға «Штангалы сораптың желілік тартпасы» орнатылды, содан бері өндірілген қо­сымша мұнай көлемі 847,7 тоннаны құрады. Қазір тәжірибелік жұ­мыстар жалғасын табуда.

2014 жылдан бері «Жетібай» кен орнындағы екі ұңғымада «Жиілік түрлендіргіші бар VLT SALT интеллектуалды басқару стан­циясының» тәжіри­белік-өн­дірістік сынақтары жүр­гізілуде. Мұнай өндіру кезінде штангалы-бат­палы сорап­тардың тартпасының жиілігін реттеуге және максималды дебитке автоматты түрде икемдеу­ге арналған станция сораптар­дың тиімді толтырылуын арнайы құ­рылғыларсыз да қадағалай алады. Тартпаның жиілігінің ұңғыма ағысының қарқынына автоматты түрде икемделуінің арқасында жұ­мыс тиімділігін арттыруға және жұмсалатын электр қуатын үнем­деуге болады. Тәжірибелік жұмыс­тар жалғаса бермек.

Жоғарыда айтқанымдай, «Қа­лам­қас» кен орнындағы ұңғы­ма­лар­ды полимерлік суландыру әдісінде тәжірибелік сынақ жұмыстары тиімді нәтиже бер­ген жағдайда осы технология «Қаламқас» кен орнында кеңінен қолданысқа  енгізілетін болады. Өндірістік тауарларды «Жетібаймұнайгаз» кен орнының қоймалары мен базаларына тікелей жеткізу бойынша пилоттық жобаны іске қостық. Бұған дейін жүктер алдымен Маңғышлақ стан­циясындағы базаларымызға жет­­кізіліп, содан кейін кен орындарына жөнелтілетін. Ал енді өн­дірістік басқармаларымыз ар­тық жұмыстардан арылып, жүктерді тікелей қабылдап алуда. Осылайша, жүк тасымалдауға кететін уақытты қысқартумен қатар оны сақтауға кететін шығындарды да азайтып отырмыз.

– Сұхбатыңызға рахмет!

Фарида МҰҢАЛҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.