Маңғыстау ауданында мал азығы мәселесі қалай шешіліп жатыр

Жуырда ғана ауданымызда мал азығының қымбатшылығы және шаруашылық саласында туындаған түйткілді мәселелер турасында ҚР ауылшаруашылығы министрлігі жанынан құрылған арнайы жұмыс тобы шаруа қожалық иелерімен кездесу ұйымдастырған болатын. Кездесуде шаруа қожалық иелерінің жан айқайын, мұң-мұқтаждықтарын ескерген арнайы жұмыс тобы мен ҚР Парламент Мәжілісінің депутаттары нақты шешім қабылдау үшін жұмыстанатындықтарын жеткізді. Араға бір апта уақыт салып, шаруа қожалық иелері үшін қандай қолайлы шешімдер қабылданғандығын білу мақсатында Маңғыстау аудандық ауыл шаруашылығы бөлімінің басшысы Орынғали Күзембаевпен сұхбаттасқан болатынбыз.

- Орынғали Сырымұлы, ауданда мал азығы мәселесінің көңіл көншітпей тұрғаны баршаға мәлім. Осы орайда жуырда ғана республика деңгейінде арнайы жұмыс тобы келіп, шаруа қожалық иелерінің жан айқайын тыңдап, тиісті шешімдер қабылдайтындықтарын айтқан болатын. Толығырақ айтыңызшы, қандай шешім қабылданды?

- Иә, арнайы жұмыс тобы өкілдері аудан бойынша ауылшаруашылық саласындағы күн тәртібінен түспей келе жатқан, кезек күттірмейтін мәселелерді шаруа қожалық иелерінің өз аузынан естіді. Мал басын аман алып қалу үшін шырылдаған халықтың талап-тілегіне құлақ түріп, тиісті шешімдерді қабылдауға уәде етті. Жуырда ғана аудан әкімінің орынбасары А.Аққұлов жеткізген жақсы жаңалық, Ақтөбе облысы, Қобда ауданымен меморандумға отыру осы уәде етілген жұмыстардың алды деп есептеймін.

Сондай-ақ Маңғыстау облысында қуаңшылық жағдайының орын алуына байланысты мал басын сақтап қалу мақсатында ағымдағы жылдың маусым, қыркүйек айларына дейінгі мерзім аралығында төтенше жағдай жариялауға Қазақстан Республикасы Үкіметіне ұсыныс енгізу мәселесі қарастырылып жатыр. Маңғыстау облысына басқа өңірлерден шөп және жем жеткізудің тиімді жолдарын іздестірудеміз. Шұғыл түрде мал басын бірдейлендіру жүйесіне тіркеу және аудан әкімдіктерімен бірлесе отырып, мал басы санын нақтылау жұмыстары жүргізілуде.

- Жергілікті шаруа қожалық иелерімен өткен кездесуде маусымдық мал жайылымдарын өзге облысқа көшіру, өзге облыстан жер алу мәселесі көтерілді. Өзіңіз айтпақшы, Ақтөбе облысымен аудан арасында келісім өткендігі баршаға белгілі. Ауыл арасының шалғайлығы қожалық иелерінің қалтасына салмақ түсірмей ме, оған кімдер өтініш бере алады?

- Ауданымызбен ынтымақтастық ретінде Ақтөбе облысының Қобда ауданы бекітілді. Екінші маусым күні Қобда ауданындағы жұмыс сапарында аудан әкімі Болат Кулов аудандағы «Шекемір» елді мекенінен шабындық жерлерді көрсетіп, ниеттеніп келген шөп шабушыларға маусымдық шабындыққа 10 000 гектар жер көлемін беруге және қажетті жағдайда жерді ұлғайтатындығын атап өтті. Қазіргі таңда ауданымыздағы шөп шабушы кәсіпкерлерге аталған жерден шөп шабуға ұсыныс беріп жатырмыз. Қобда ауданының шөп шабатын шаруа қожалық иелерімен аудан әкімінің орынбасары А.Аққұлов кездеу өткізді. «Қобда Агро» шаруа қожалығының жетекшісі Асылбек Нұргелдин сөз алып, шабындық 30 000 гектар жер, кепілге қоятын мүлкі бар екенін айтып, берілетін қаржыны алуға ниетті екенін атап өтті. Шөп шабу жұмыстары алдағы жеті күн ішінде басталатынын және де ауданымызға шөп жеткізуге қолдан келген көмегін аямайтындығын жеткізді.

- Аудан бойынша төрт түлік малды қыста азықпен толықтай қамтамасыз ету үшін қанша көлемде азық қажет және оған биыл қол жеткізуге мүмкіндік бар ма?

- Жалпы мал басына шаққанда бір айға жеткілікті мал азығы есептеліп шығарылды, оның ішінде аудан бойынша жем қоры 17 000 тонна, шөп қоры 35 000 тонна болу керектігі нақтыланды. Аудандағы жеке кәсіпкерлер мал азығын қолжетімді бағада Қостанай облысынан үздіксіз тасымалдауда. Шөп қоры жоғарыда айтылғандай Ақтөбе облысынан және өз өңіріміздің жеке шаруа қожалық иелерінен тасымалданатын болады.

- Төрт түлік халықтың күнкөріс көзі екендігі белгілі. Мал басын аман алып қалу мақсатында жасалып жатқан әрекеттер қазіргі жағдайдың алдын алуға қаншалықты ықпалын тигізеді? Тығырықтан шығуға көмектесе ме?

- Әрине, мал басын аман алып қалу қазіргі біздің басты міндетіміздің бірі болып отыр. Ауданнан қазіргі таңда 15-ке жуық шаруа қожалық иелері маусымдық шөп шабу жұмыстарына өтініш түсіріп, оның ішінде шөп шабу жұмыстарын бастап кеткен де қожалық иелері бар. Барлық жұмыс жоспарға сай жүргізілсе, ауданымызға қолжетімді бағада жеткізіледі. Қазіргі жағдайда барлық келетін мал азығы жағдайдың алдын алуға ықпалын тигізеді деп ойлаймын.

- Сұхбаттасқаныңызға рақмет!

Дина УТЕПБЕРГЕНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.