Маңғыстаулық спортшылар 9 жүлдемен Ташкенттен оралды
[ 2019 ] 9 қыркүйек, 11:29 | Спорт
6 қыркүйек күні Ташкентте өткен ережесіз жекпе-жектен ашық Азия чемпионаты өз мәресіне жетті. Жарыста маңғыстаулық спортшылар 4 алтын, 2 күміс, 3 қола жүлдені қанжығасына байлады, - деп хабарлайды mangystaumedia.kz сайты.
Додаға 10 елден келген 1000-нан аса спортшы қатысты. Жекпе-жек 4 – 17 жас аралығындағы ерлер мен қыздар арасында өтті.
Ашық Азия чемпионатында 12-13 жас арасында 35 келі салмақта сынға түскен маңғыстаулық Әбілмансұр Құрманбаев алтын жүлдені иеленді. 14-15 жас категориясы бойынша 37 келі салмақ дәрежесінде Бекзат Джапаров және 53 келі салмақта Сұңғат Сансызбаев алдыңғы қатарда бой түзеп, жеңіс туын желбіретті. Ал 80 келі салмақта Иса Керимов 16-17 жас категориясы бойынша өнер көрсеткен спортшылардан оза шауып, жүлделі бірінші орынды алды.
53 келі Аслан Бақытғалиев пен 45 келі Бектілеу Қазбекұлы екінші орынға жайғасты.Сондай-ақ 41 келі Азамат Давлетумбетов, 65 келі Жасұлан Сансызбаев 14-15 жас категориясы бойынша күш сынасса, 75 келі салмақта Елдос Амантуров 16-17 жас аралықтағы спортшылармен күресті. Нәтижесінде жігіттер 3-орынды қанжығасына байлады.
Жұлдызай ҚАЛИЕВА
Суретті ұсынған Жеңіс Қайранов
1023
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
