Бейнеуде шахматтан облыстық «Ақбозат» мектеп лигасы өтті
[ 2019 ] 25 ақпан, 09:24 | Спорт
Маңғыстау аймақтық дене тәрбиесі орталығының ұйымдастыруымен жақында Күйкен орта мектебінде шахматтан облыстық «Ақбозат» мектеп лигасы өткізілді.
Жарыстың мақсаты - облыста шахмат спортын дамыту, жалпы білім беретін мектептерде шахмат спорт түрін кеңінен насихаттау, жас дарынды спортшыларды іріктеп, оларды республикалық, халықаралық жарыстарға дайындау жұмыстарын жүргізу.
«Ақбозат» мектеп лигасы жарысына Ақтау, Жаңаөзен қаласы, Маңғыстау, Түпқараған, Қарақия, Бейнеу ауданындағы жалпы білім беретін мектептерден 6-8 сыныптар мен 9-11 сынып оқушыларынан құралған 13 құрама команда қатысып, бақ сынады.
Жарыстың ашылу салтанатында Маңғыстау аймақтық дене тәрбиесі орталығының маманы Қоңыратбай Испанов және аудандық білім бөлімінің басшысы Батырбек Демократұлы сөз сөйлеп, қатысушы командаларға сәттілік тіледі.
Екі күнге созылған жарыста төрешілердің шешімі бойынша 1-орынды Ақтау қаласындағы мамандандырылған №11 физика-математика мектебінің 6-8 сынып оқушыларынан құралған құрама командасы мен Бейнеу ауданындағы Күйкен орта мектебінің 9-11 сынып оқушыларынан құралған құрама командасы иеленіп, республикалық кезеңге жолдама алды.
Жарыс соңында жеңімпаз командаларға грамота, диплом және медалдар табысталды.
Үміт ҚАЗДАЕВА
1240
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
