Маңғыстаулықтар Азиада чемпионы Дархан Нортаевты күтіп алды

Джакарта қаласында өтіп жатқан Азиада ойындарында джиу-джитсудан алтын алған Дархан Нортаев бүгін елге оралды.

Чемпионды күтіп алуға облыстық спорт басқармасы, спорт саласы өкілдері, туыстары мен достары жиналды. Əуежайға бірнеше сағат бұрын жиылған жанкүйерлер Дарханның суреті бейнеленген плакаттарын, гүл шоқтары ман шарларын алып тағатсыздана ұшып келу есігін бақылады.

Олар ел абыройын асқақтатқан батыр ұлды зор қошеметпен, ыстық ілтипатпен тосып алды.

https://www.youtube.com/watch?v=P8nBF8eRNJY

Жазғы Азия ойындарына Маңғыстаудан 13 спортшы аттанған болатын. Оның үшеуі джиу-джитсу спортынан сынға түсті.

- Дархан Нортаевты чемпион болады деп ойлаған жоқпыз. Үшінші орынға ілінсек деп барғанбыз. Бразилияда, Таиландта жаттығу жиындарында болды. Соның жемісі деп ойлаймын. Додаға апарған үш спортшымыздың ішінен Дархан үздік шықты. 5 кездесу өткізді, қарсыластары өте мықты болды. Олардың барлығы Дарханды Əлем чемпионы ретінде таниды. Ол өзінің мықтылығын бұл жолы да дəлелдеп шықты, - дейді Маңғыстау облысының джиу-джитсудан аға жаттықтырушысы, Дарханның жеке бапкері Болат Дүйсембиев.

Дархан джиу-джитсумен 14 жасынан айналысып келеді. 2017 жылдан бері үлкен додаларда Маңғыстаудың намысын қорғап, жүлдегер атанып жүр. Қазір оның қоржынында Азия чемпионы, джиу-джитсудан қазақтан шыққан тұңғыш Əлем жəне Азия ойындарының чемпионы атақтары бар.

https://www.youtube.com/watch?v=QdIXQ5Swxa0

 - Жарыстан кейінгі 1-2 күн сезімдер түсініксіз болып, чемпион атанғанымды артынан ұға бастадым. Сезімімді айтып бере алмаймын (күліп). Бес жекпе-жек өткіздім. Ең мықтылары арабтар болғандықтан бəрі солар чемпион болады деп ойлады. Бірақ жартылай финалда, финалда ұтуға күшім жетті. Мені қолдаған халқыма, жерлестеріме, жаттықтырушыма алғыс айтамын, - деді чемпион өз сөзінде.

Алда Дархан Қазақстан кубогына жəне Əлем чемпионатына қатысуды жоспарлап отыр. Ал бапкерлері маңғыстаулық чемпионға 2024 жылғы Олимпиада ойындарында жанкүйер бола аласыздар деген болжам айтты.

Айта кетейік, Дархан Азиада ойындарындағы ең сымбатты жігіттердің ондығына енген. Дарханға алдағы додаларда сəттілік тілейміз!

Теңге БЕКМҰРЗАЕВА