Шетпедегі Б.Жұмалиев мектебінің түлектері футболдан сайысты

Шетпедегі Берекет Жұмалиев атындағы №2 орта мектептің 2006 жылғы түлектері өмірден ерте кеткен құрдастары Бекзат Сайкомов, Жәнібек Байпақов және Айбек Дәлуовті еске алуға арналған шағын футболдан турнир өткізді. Осыдан 2 жыл бұрын алғаш рет ұйымдастырылып, биыл жалғасын тапқан жарысқа аталған мектепте оқыған 1987–1997 және 2000 жылы туған жастар қатысып, бағын сынады.

Жастарды елжандылыққа баулу, салауатты өмір салтын насихаттау мақсатында ұйымдастырылған футбол қызықты да тартысты өтті. Ептілікті, жылдамдықты, төзімділікті, ұйымшылдықты қажет ететін ойын қорытындысында 1-орынды 1989 жылғы жастар жеңіп алды. Тартысты бәсекеде 2-орынды 1995 жылғы жастар қанжығасына байласа, 3-орын 1992 жылғы жастардан құралған командаға бұйырды. Жүлдегерлерге ұйымдастырушылар атынан грамота мен қаржылай сыйлық табыталды. Жүлделі 1-орынға 50 мың, 2-орын иегерлеріне 30 мың, 3-орын алғандарға 20 мың теңге берілді. Сонымен қатар белсенділік танытқан Ануар Аманжолұлы, Ақжол Алиманов «Үздік шабуылшы», Ерболат Мұратов «Үздік қақпашы» аталымын жеңіп алды. Үздіктерге де қаржылай сыйлық табысталды.

- Бүгін ағаларымызды еске алуға арналған турнирге қатысып, 2-орынды жеңіп алдық. Қуаныштымыз. Жәнібек Байпақов ұстазымыз бізді кезінде футболға баулып, қыр-сырын өзі үйреткен еді. Наурыз мерекесі кезінде шынығып, бір сергіп қалдық. Жарыс жеңімпаздарын жеңісімен құттықтаймын! – деді Ақжол Алиманов.

Жарыс соңында өмірден озған достарымыздың ата-аналарына құрмет білдіріп, сыйлығымызды табыстадық. Бір қуанып, жасап қалған олар біздерге алғысын айтып, бата берді.

Ұлыстың ұлы күні мейрамында өмірден өткен достарымыздың рухына Құран бағыштап, мал сойып, ауылдағы жағдайы төмен отбасыларға ет, азық-түліктер апардық.

Әділжан ОРАЗАЛЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.