Түбек теміржолшылары бірінші орында
[ 2017 ] 5 шілде, 06:42 | Спорт
«Қазақстан темір жолы» ҰК» АҚ теміржолшылар кәсіподағының 25 жылдығына орай, шағын футболдан Ақтөбе қаласында өткен республикалық чемпионатқа маңғыстаулық теміржолшылар да қатысты. 8 топтың арасынан оза шыққан олар, жүлделі I орынды қанжығаға байлады.
Түбек теміржолшыларын жарысқа бастап барған Маңғыстау жүк тасымал бөлімшесі кәсіподағының төрағасы, орталық кеңес теміржолшылар кәсіподағының аймақтағы өкілі Әзірбай Тұрмағанбетовтың айтуынша, бұған дейін де біраз нәтижелерге жетіп жүрген жерлестеріміз ол жақта да үздік ойын көрсете алды.
- Біздің кәсіподақ саладағы спортқа көп көңіл бөледі. Бұдан бір-екі жыл бұрын жұмысшылардың қолдауымен ашық спорт алаңын салғанбыз. Енді соны жаңалап, газон төсеуді жоспарлаудамыз. Алаң волейбол, баскетбол, шағын футболға шақталған. Сондай-ақ, кішігірім разъездер мен Ералы, Үстірттегі жұмысшыларымыз үшін де ашық спорт алаңқайларын жасап бергенбіз. Жылдың басында "Каскортранссервис" мекемесінің жабық стадионын бір жылға жалға алдық. Қазір теміржолшыларымыз бар жағдайы бар стадионда жатығып жүр,-дейді Әзірбай Тұрмағанбетов.
Аймақ теміржолында бүгінде 8 мини футбол командасы бар. Маңғыстау теміржолының намысын Ақтөбеде қорғаған соның бірі. Енді бұл командалар кәсіподақтың 25 жылдығы, Маңғыстау жүк тасымал бөлімшесінің 10 жылдығы және теміржолшылар күніне Маңғыстау кәсіподағы ұйымдастыратын сайыстарда өзара бақ сынамақ.
Шахида ЖҰМАН
1326
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
