Күйші, сазгер Рафаэль Қарғабайдың шығармашылық кеші өтті

"Тұғырымсың, Ақкетік, Түпқараған!" деген атаумен Түпқараған аудандық мәдениет үйінде күйші, сазгер Рафаэль Қарғабайдың шығармашылық кеші өтті. Тұсауын 16 қарашада кескен «Ауыл шаттығы» ұлт-аспаптар ансамблінің орындауындағы Құрманғазының «Адай» күйімен шымылдығы түрілген кешке аудан өнерпаздарынан бөлек, Маңғыстау ішіндегі ақын-жазушылар мен Астана секілді өзге де қалалардан келген қонақтар, мәдениет майталмандары қатысты.

«Адайдың зары», «Бекбаулы ата» сынды күйлердің авторының шығармашылық кеші «Рухани жаң­ғыру» бағдарламасы аясында ұйымдастырылып, кеш барысында Рафаэль Сиғалиұлының өз қала­мынан туған «Жыңғылды­ - киелі ме­кенім», «Белгілі Нұрбаулы атым адайларға», «Құлсары ата» кітап­тарының және кеш атауымен ата­латын күй жинағының тұсауы кес­ілді. Өз кезегінде сахна төріне шы­ғып, сөз алған жазушы, «Махам­бет» сыйлығының иегері Әбілқайыр Спан жазушының өз туған жері ту­ралы жазуы қиын екендігін, өзінің бұл тақырыпқа біршама қадам ба­сып, қалам тербеп, оның өз көңі­лінен шықпағандығын айта келіп, кеш иесінің «Жыңғылды­ - киелі ме­кенім» кітабы туралы сөз қозғады. «Рафаэльдің Жыңғылдысы жөнін­ де жазғанын оқып, қызықтым... Се­нің өнердің өзге саласына кеткенің жақсы болған. Жазушылыққа түгел бет бұрғаныңда, бізге нан жоқ екен» деп сөз аяғын әзілге бұрған жазушы тілегінен соң, ел аузы дуа­лы Светқали Нұржан­-Айтман ақын­ға құлақ қойды. «Бабалардан дарыған қасиет қолынан әуелі күй болып шықты, бабалардан дарыған өсиет енді қолынан сөз болып шығып жатыр. Көне шекпеннің өңірінде үзілмей қалған жалғыз алтын түймедей жылтыраған нәрсе көрсе, со­ның барлығын теріп, халқына ұсынып жатыр. Тәңір жарыл­қасын» деген ақын кітап тұ­саукесерін жасады.

Кеш барысында Рафаэль Қарғабайдың өнердегі шәкірті Ботагөз Сүлеймен Қазтуғанның «Құс қайтаруын» нақышына келтіріп орындаса, өнердегі ұс­тазы Айтберген Жаңбыршы кеш иесінің күйшілік қыры тура­сында сөйледі. Ғасырлар бойы қазақтың көңіліне көрік, жаны­на жалау болып, арман мен мұратқа, сенім мен үмітке үгіт­теп келе жатқан асыл мұраны асқақтатқан кеш Поллок туын­дыларындай уақыт тілі ғана түсін­діріп бере алатын екі ғасырға жуық тарихы бар Түпқараған ауданы тұр­ғындарының рухани шөлін бір қан­дырды. Тәңір маңдайымызға тарт­қан ерекше пешенелі сыйымыздың әлі­-ақ өз арнасына қайта толып, жоғалған қадірін табарына дәме­лендірді, сенімімізді нығайта түсті.

Өз тілшімізден

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.