Ақтауда Т. Ахтановтың «Махаббат мұңы» драмасының тұсаукесері өтті

«Байтақ мекенім» қоғамдық қорының қолдауымен Қазақстанның «Ақ жол» демократиялық партиясы Маңғыстау облыстық филиалы жанындағы «Ақ жол-жастар» жастар театры әртістерінің қатысуымен Жантөрин атындағы музыкалық драма театрының кіші залында Ұлттық әдебиетімізде өшпес із қалдырған ақиық ақын Төлеген Айбергеновтің өлеңдерімен өрнектелген Тахауи Ахтановтың «Махаббат мұңы» лирикалық драмалық қойылымының тұсаукесері өтті.

Қойылым басталмас бұрын, Қазақстанның «Ақ жол» демократиялық партиясы Маңғыстау облыстық филиалы төрағасы Жаңбырбай Жәнібекұлы және «Байтақ мекенім» қоғамдық қорының төрағасы Сәбит Тоқымбетов Төлеген Айбергеновтің шығармаларын насихаттауға атсалысып жүрген Светқали Нұржан, Қалбай Әбдіраманов, Ақшагүл Рамазанова, Әбіл Жұмағалиев, Нұрбол Оқуов, Сағындық Рзахметов, Рахмет Аяпберген (марқұм), Жаңбырбай Матаевты Төлеген Айбергеновтің 80 жылдығына арналған естелік медалімен марапаттады.

Адалдық, адамшылық, достық, сатқындық туралы сыр шертетін пьесаның өн бойында Төлеген Айбергеновтің сөзіне жазылған әндері шырқалып, өлеңдері оқылды.

Қойылым соңында Маңғыстау облыстық мәдениет басқармасының басшысы Пания Сармурзина және «Ақ жол-жастар» жастар қанатының ата-аналар комитетінің төрайымы Мейрамгүл Шайхықызы сөз сөйлеп, жастарға сәттілік тіледі. Сонымен қатар, Қазақстанның «Ақ жол» демократиялық партиясы Маңғыстау облыстық филиалының төрағасы Жаңбырбай Матаев жастардың алдағы жоспарларымен бөлісіп, келген көрермендерге алғысын жеткізді. Ақын Ақшагүл Рамазанова талапкер жастарға өлең жырын арнады.

Үміт ЖӘЛЕКЕ

Суреттерді түсірген Талант ҚҰСАЙЫН

[gallery td_select_gallery_slide="slide" ids="49181,49182,49183,49184"]