Шекарадан есірткі алып өтпек болған шетелдікке 1,2 млн айыппұл салынды

©

Санкт-Петербург қаласынан шығып, Ресей-Қазақстан шекарасы арқылы Өзбекстанға есірткі алып өтпек болған шетелдікке қатысты сот шешімі шықты. Бұл туралы Бейнеу аудандық сотының баспасөз қызметі хабарлады.

Сотталушы осы жылы наурыз айында Ресей Федерациясы Санкт-Петербург қаласынан шығып, Ресей-Қазақстан шекарасы арқылы Өзбекстанға қарай жолға шыққан. «Тәжен» кеден бекетінің қызметкерлері қызметтік-іздеуші иттің көмегімен кедендік бақылау жүргізу кезінде С.-ның шұлығынан салмағы орамасыз 1,54 грамм болатын гашиш есірткі затын тапқан. Сондай-ақ С.-ның айналысы шектелген заттардың контрабандасын жасауға оқталғаны және бұған дейін есірткіні қолданғаны да анықталды.

Өзбекстан Республикасының азаматы С-ға қатысты қылмыстық іс Бейнеу аудандық сотында қысқартылған тәртіпте ҚР ҚК-нің 24-бабының 3-бөлігімен, 286-бабының 1-бөлігімен, 296-бабының 2-бөлігімен қаралды.

Сот сотталушының жазасын жеңілдететін мән-жайлар ретінде кінәсін мойындауын, өкінетінін, бірінші рет сотты болуы мен кәмелетке толмаған балаларының барын ескеріп, ҚР ҚК-нің 24-бабының 3-бөлігі, 286-бабының 1-бөлігі, 296-бабының 2-бөлігімен кінәлі деп танып, оған түпкілікті 500 айлық есептік көрсеткіш мөлшерінде 1 202 500 теңге көлемінде айыппұл жазасын тағайындады.

Үкім заңды күшіне енген жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.