Сал ауруына шалдыққан маңғыстаулық балаға ота сәтті жасалды

Сал ауруына шалдыққан маңғыстаулық 3 жастағы балаға сәтті операция жасалды. Шымкентте жасалған отаға ресейлік дәрігер де қатысты, - деп хабарлайды mangystaumedia.kz сайты.

Облыстық денсаулық сақтау басқармасының баспасөз қызметінің айтуынша, бұлшықеттің тырысуы мен қозғалыссыз қалған жүйке-жүйелердің жұмыс жасауына ықпал ететін фибротомия атты сырқат түріне операция жасалды.

- Облыстық балалар үйінде сал ауруына шалдыққан балаларға ота жасату үшін Шымкент қаласына медбике, бала күтуші және әлеуметтік қызметкермен бірге аттандық. 2 және 3 жастағы екі баламызды ота жасауға алып бардық. Қыз балада отаға қарсы көрсеткіш болды. Сондықтан тек бір балаға ғана ота жасалды. Операция сәтті аяқталды деп айтуға болады. Қазіргі нәтижелері жаман емес. Қол ақтарының тырысу белгілері кетіп жатыр. Ендігі кезекте оңалту жұмысына дайындап жатырмыз,-деді Маңғыстау облыстық балалар үйінің директоры Сәру Ермұханова.

Айта кетейік, аталған сырқат түріне отаны Ресейден келген дәрігер, медицина ғылымдарының докторы, профессор Ульзибаттың шәкірттері жасаған. Операцияның сәтті өтуіне, жол жүру билеті, үй-жаймен қамту жұмысына жергілікті демеушілер қолдау көрсеткен. Алдағы уақытта бүлдіршіннің одан әрі қалыпты деңгейге жетіп, жақсаруы үшін шілде және тамыз айында екі ота жасалады деп жоспарланып отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.