"BI Жұлдызай" қайырымдылық қорының, "Mumkindik" жобасы аясында Мәскеуден келген ортопед-травматолог Константин Жердев қол-аяғында ортопедиялық ақауы балаларға ота жасады.
Операция Маңғыстау облыстық көпбейінді балалар ауруханасында өтті,-деп хабарлайды mangystaumedia.kz сайты МО Денсаулық сақтау басқармасының баспасөз қызметіне сілтеме жасап.
- Басты мақсат- қазақстандық әріптестеріммен тәжірибе алмасу және бүлдіршіндерге көмектесу. Кеше және бүгін ақтаулық дәрігерлермен бірлесіп аяқтың буындары мен байламдарының туа біткен және жүре пайда болған ақауы бар балаларға ота жасадық, - деді травматолог-ортопед Константин Жердев.
Ресейлік дәрігер жамбастың шығуы, аяқ сүйектерінің экзастозы, аяқтың варустық деформациясы бар бірнеше балаға аурухананың дәрігерлерімен бірлесе отырып операция жасады.
Ал түстен кейін хирургтың қабылдауында 60-қа жуық бала болды. Кеңес беріліп, диагноздары анықталып, емдеу жолдары түсіндірілді. Константин Жердев алдағы уақытта өңір дәрігерлерімен бірлесіп, Маңғыстау облысында ортопедиялық орталық қалыптастыруды жоспарлап отыр.
Айта кетейік, травматолог-ортопед Константин Жердев 18-19 тамыз күні жаңаөзендік балаларды қабылдап, тегін кеңес береді.