«Ауыл-ел бесігі» бағдарламасы шеңберінде 2022-2023 жылдары Жаңаөзен қаласындағы Мерей, Ақбұлақ шағынаудандары мен Қызылсай ауылында 3 дәрігерлік емхана іске қосылды. Сонымен қатар Жаңаөзен қаласына қарасты «Кендірлі» елді мекенінде дәрігерлік амбулатория құрылысы басталды. Бұл туралы Қоғамдық коммуникация орталығында өткен брифингте Маңғыстау облыстық денсаулық сақтау басқармасының басшысы Аманбек Жұмыров мәлімдеді, деп хабарлайды mangystaumedia.kz сайты.
Спикердің айтуынша, Мемлекет басшысы Қасым-Жомарт Тоқаевтың Маңғыстауға келген іс-сапары барысында жүктеген тапсырмаларына сәйкес денсаулық сақтау нысандары бой көтерген. Бұдан бөлек жедел жәрдем бригадалары қызметін жүйелі ұйымдастыру мақсатында 13 бірлік санавтотранспорт сатып алу жоспарланып, алғашқы 4 бірлік Маңғыстау ауданына берілді.
Сондай-ақ Бейнеу ауданы үшін 7, Жетібай ауылы және Қарақия ауданына 1 медициналық санитарлық автотранспорт алу жоспарланған.
- Президенттің тікелей тапсырмасына сәйкес құрылыс жұмыстары да қолға алынды. Мәселен бүгінде Мұнайлы аудандық ауруханасының құрылысы жүргізіліп, 2024 жылы қолданысқа берілмек. Сонымен қатар заманауи көпбейінді орталық ауданаралық ауруханалар желісімен қамту негізінде Бейнеу аудандық орталық ауруханасы мен Боранқұл аудандық ауруханасын біріктіру жоспарлануда. Медициналық техникамен жабдықтауға және күрделі жөндеу жүргізу үшін республикалық бюджеттен 304,7 млн теңге қаражат бөлініп отыр, - деді Аманбек Жұмыров.
Сондай-ақ спикер брифингте «Маңғыстау облысын әлеуметтік экономикалық дамытудың 2021-2025 жылдарға арналған кешенді жоспары» және «Аймақтық даму жоспарлары» шеңберінде соңғы 2 жылда 13 жеке медицина ұйымы ашылып, стационарлық көмекпен қатар, халыққа амбулаториялық-емханалық көмек көрсетіп жатқанын айтты.
-2023-2027 жылдар аралығында 20 медициналық мекемені жөндеу жоспарланды. Оның ішінде Бейнеу, Маңғыстау, Түпқараған және Қарақия аудандары бар. Сонымен қатар биыл облыстық психикалық денсаулық орталығы, Қызылтөбе, Дәулет, Баянды және Қызыл төбе-2, Мұнайлы ауданына қарасты медицина ұйымдары және Маңғыстау ауданына қарасты Ақшымырау ауылындағы медициналық мекемеге жөндеу жұмыстары жүргізіліп жатыр, - деді Аманбек Жұмыров.
Тапсырмаға сәйкес дәрігерлерді ынталандыру бағытында жергілікті бюджеттен жас мамандарға 1,5 млн теңгені құрайтын әлеуметтік көмек көрсетіліп, дәрігерлерге кәсіби біліктілігін арттыруға 99 млн теңге қаражат, бакалавр, интернатураға 165 грант, резидентураға 33 грант бөлінген.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
