Маңғыстауда 20 сальмонеллез ауруы тіркелді

Жаз маусымы басталғалы облыста 20 сальмонеллез ауруы тіркелді. Науқастардың басым бөлігі - әскерилер. Ал балаларда жұқтырудың тағы екі жағдайы анықталды, - деп хабарлайды mangystaumedia.kz сайты mangystautv.kz сайтына сілтеме жасап.

- Ауру сарбаздар арасында сәуір айында тіркелген. Алдымен 13 жағдай тіркелсе, кейін ауру тез таралып, науқастар саны 20-ға өсті. Ағзаға сальмонелла бактериясы енген соң дене қызуы көтеріліп, іші ісіп, құрысып қалады, содан кейін антибиотикті қабылдағаннан кейін 1 апта ішінде адам қалпына келеді. Мысалы, ауру адам қоғамдық тамақтандыру қызметкері болса, тамақ пісіру кезінде басқаларға да жұқтыруы мүмкін, – дейді Маңғыстау облысы бойынша санитарлық-эпидемиологиялық бақылау департаменті басшысының орынбасары Бердібек Саралтаев.

Санитарлық эпидемиологтар қоғамдық орындарда азық-түлік өнімдерін, оның ішінде жеміс-жидек пен көкөністі сатып алғанда, оның құрамы мен жасалу мерзіміне, сыртқы түріне ерекше назар аудару керектігін еске салады.

Сальмонеллез - бұл сальмонелла тобына жататын көптеген қоздырғыштарды тудыратын жіті ішек ауруы. Ғалымдар сальмонеллалардың 700-ден астам түрін анықтады. Олар қоршаған ортаға төзімді, төмен температурада ұзақ сақталады. Ауру қоздырғыштары тағамда, әсіресе жұмыртқада, сары майда, сүтте және ет өнімдерінде тез көбейеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.