Маңғыстауда қызылшамен ауырған 36 науқас тіркелді

Маңғыстау облысында қызылша ауруына күдікті 48 жағдай тіркеліп, науқастардан алынған қан сынамаларын зертханалық талдау нәтижесінде 36 жағдайда «оң» нәтиже анықталды деп хабарлайды mangystaumedia.kz сайты ҚКО сілтеме жасап.

- Қызылша – ауа – тамшылы жолымен жұғатын вирусты жұқпалы ауру. Ауру дене қызуының көтерілуімен, 2- 4-ші күндері теріге ақшыл қызыл түсті бөртпелердің шығуымен, жоғарғы тыныс жолдарының, ауыз-жұтқыншақ қуысының және көздің шырышты қабықшаларының қабынуымен басталады. Қызылшаны науқаспен қарым – қатынаста болған қызылша ауруына қарсы екпе алмаған адамдар жұқтыруы мүмкін,-дейді өңірлік санитариялық-эпидемиологиялық бақылау департаменті басшысының орынбасары Бердібек Саралтаев.

Облыста 2015 жылы – 292, 2019 жылы – 1 422 және 2020 жылы – 361 жағдай тіркелген. Мамандардың айтуынша, қызылша ауруынан қорғанудың ең тиімді әдісі – вакцинация.

Айта кетейік, қазір облыста 16 396 доза қызылшаға қарсы екпе бар. Тұрғындар қосымша ақпаратты тіркелген ауруханаларына барып біле алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.