Ақтаулық реабилитолог дәрігер кешенді оңалтудың көмегімен Covid-19 салдарын жеңуге кеңес берді

Невролог-реабилитолог, Маңғыстау облыстық ауруханасының неврология және оңалту бөлімшесінің меңгерушісі Ордабаев Рахымжан Асқарұлы коронавирустан кейінгі оңалтуға неліктен көңіл бөлу керектігін айтты, - деп хабарлайды mangystaumedia.kz сайты Маңғыстау облыстық ауруханасының баспасөз қызметіне сілтеме жасап.

– Оңалту – бұл іс-шаралардың тұтас кешені. Оңалту шараларының түрі мен көлемі белгілі бір адамның жағдайы мен қарсы көрсеткіштеріне байланысты болады. Сондықтан жаттығуды бастамас бұрын мамандармен кеңесу керек. Сабақ тиімді өтуі үшін пациенттер мен оның туыстары нұсқаушымен бірге оқытылады. Ал оңалту бөлімінде емделгеннен кейін олар дәрігердің ұсынысын орындап, өз бетінше үй жағдайында оқуын жалғастыруы қажет, – дейді Рахымжан Ордабаев.

Оңалту және медициналық оңалту бөлімінде науқастар физикалық белсенділікке бейімделуін қалыпқа келтіреді, тыныс алу жаттығуларын, релаксация әдістерін үйренеді.

– Коронавирустан жазылғандарды сауықтыру үшін кеуде қуысының төменгі бөлігінде қабынуға қарсы әсері бар электрофорез қолданылады, сонымен қатар виброакустикалық аппаратпен массаж жасалады. Оңалту 10 күн ішінде жүргізіледі. Егер науқас жеңіл түрде ауырса да оңалту тағайындалады, бірақ үйде жүргізіледі. Бұл қарапайым тыныс алу жаттығуларынан бөлек ашық ауада серуендеу, диетаны қосуға болады. Бөлімшеде физиотерапия және гимнастика бар. Сондықтан барлық науқас оңалту курсынан өте алады, – деді Рахымжан Ордабаев.

Бүгінгі таңда бөлімшеде коронавирустан айыққан науқастар жоқ. Күні кеше ғана соңғы екі науқас емделіп шықты.

- Коронавирустық инфекциядан емделгеннен кейін бірден ауруханадан шыққан адамды білмеймін. Тіпті, жеңіл түрде ауырғандар да кем дегенде психологиялық реабилитацияны қажет етеді. Аурудан кейін барлық науқаста астения, әлсіздік, бас ауруы, ентігу, терлеудің жоғарылауы және депрессиялық көңіл-күй болады. Коронавирустан кейінгі оңалту аурудың ауырлығына қарамастан әрбір науқасқа қажет, - дейді дәрігер.